Qazaqstanda jeke múddeler týraly deklaratsııany kim jáne qashan toltyrýy kerek

Qaǵıdalarǵa sáıkes, jeke múdde – jaýapty memlekettik laýazym atqaratyn adamnyń, memlekettik fýnktsııalardy oryndaýǵa ýákilettik berilgen adamnyń, olarǵa teńestirilgen adamnyń nemese laýazymdy tulǵanyń ózi, jaqyn týystary, jubaıy, jekjattary jáne (nemese) ózimen baılanysty basqa adamdar úshin múliktik jáne (nemese) múliktik emes ıgilikter, paıda nemese artyqshylyqtar alýǵa múddeliligi.

Jaýapty memlekettik laýazym atqaratyn adamdar, memlekettik fýnktsııalardy oryndaýǵa ýákilettik berilgen adamdar, laýazymdy tulǵalar, sondaı-aq olarǵa teńestirilgen adamdar memlekettik qyzmetke nemese memlekettik ne olarǵa teńestirilgen fýnktsııalardy oryndaýǵa baılanysty laýazymǵa kirisken ne qyzmeti (jumysy) boıynsha aýysqan kúnnen bastap 15 jumys kúni ishinde jeke múddeler týraly deklaratsııa toltyrady.

Deklaratsııa toltyrýdan mynalar bosatylady:

1. QR Prezıdenttigine, Quryltaı nemese máslıhat depýtattyǵyna, aýdandyq mańyzy bar qala, kent, aýyl, aýyldyq okrýg ákimine kandıdattar, sondaı-aq jergilikti ózin-ózi basqarýdyń saılanbaly organdaryna múshelikke kandıdattar;

2. avtomobıl joldarynda tehnıkalyq jáne avtorlyq qadaǵalaý júrgizetin adamdar, sondaı-aq memlekettik bıýdjet qarajaty esebinen qarjylandyrylatyn jobalardy jáne (nemese) baǵdarlamalardy irikteýge, olardy qarjylandyrý týraly sheshim qabyldaýǵa nemese memlekettik qoldaý sharalaryn usynýǵa qatysatyn alqaly organdardyń músheleri.

Jeke múddeler týraly deklaratsııada mynadaı málimetter kórsetiledi:

· deklarantpen bir memlekettik organda, onyń ishinde onyń aýmaqtyq bólimshelerinde, vedomstvolyq baǵynysty memlekettik organdarda, vedomstvolyq baǵynysty uıymdarda nemese joǵary turǵan memlekettik organdarda, uıymda ne kvazımemlekettik sektor sýbektisinde jumys isteıtin jaqyn týystary, jubaıy, jekjattary nemese ózimen baılanysty basqa adamdar týraly;

· pedagogıkalyq, ǵylymı, shyǵarmashylyq nemese ózge de aqy tólenetin qyzmeti týraly;

· Qazaqstan Respýblıkasynda jáne (nemese) shet memleketterde tirkelgen kommertsııalyq uıymdarǵa qatysýy, jeke kásipkerlikpen aınalysýy, onyń ishinde qazirgi laýazymyna kiriskenge deıingi bir jyl ishindegi osyndaı qyzmeti týraly;

· menshik nemese ózge de zattyq quqyq negizinde ózine tıesili múlikti senimgerlik basqarýǵa berýi týraly.

Memlekettik organdarda, uıymdarda nemese kvazımemlekettik sektor sýbektilerinde uıymdastyrýshylyq-ókimdik nemese ákimshilik-sharýashylyq fýnktsııalardy atqaratyn adamdar qosymsha málimet usynady. Olar jaqyn týystary, jubaıy nemese jekjattary aktsııalaryna ne jarǵylyq kapıtalyndaǵy úlesterine ıelik etetin nemese basqarýyna qatysatyn zańdy tulǵalar týraly málimetterdi kórsetýge tıis. Bul talap atalǵan zańdy tulǵalar deklarant jumys isteıtin memlekettik organmen, uıymmen nemese kvazımemlekettik sektor sýbektisimen azamattyq-quqyqtyq qatynasta bolǵan jaǵdaıda qoldanylady.

Deklaratsııa jumys orny boıynsha personaldy basqarý qyzmetine nemese kadr qyzmetiniń mindetin atqaratyn jaýapty adamǵa jazbasha túrde tapsyrylady.

Eger deklaratsııada tolyq emes nemese shyndyqqa sáıkes kelmeıtin málimetter kórsetilse, ony tapsyrǵan kúnnen bastap 10 jumys kúni ishinde jeke múddeler týraly qosymsha deklaratsııa berýge bolady.

Jańa málimetter paıda bolǵan jaǵdaıda deklaratsııa jańartylady.

Memlekettik organdarda, uıymdarda nemese kvazımemlekettik sektor sýbektilerinde kadr qyzmeti qyzmetkerleriniń arasynan jeke múddeler týraly deklaratsııalardy jınaýǵa jaýapty adamdar taǵaıyndalady.

Deklaratsııa memlekettik qyzmetshiniń jeke isine tirkeledi.

Qaýly 2027 jylǵy 1 qańtardan bastap kúshine enedi.

Buǵan deıin Qazaqstanda jeke múddelerdi deklaratsııalaý mindeti engiziletinin jazǵan edik.