Qazaqstanda jeke klınıkalarǵa talaptar kúsheıtilmek

  Densaýlyq saqtaý mınıstri Ajar Ǵınııat elimizdegi emhanalardaǵy uzyn-sonar kezekke qatysty túsinik berdi, dep habarlaıdy Kazinform.

«Birinshiden, tsıfrlandyrý damyp keledi. Árıne, biz muny bir jylda iske asyra almaımyz. Bul baǵytta aýqymdy jumys bar. Qazaqstandaǵy medıtsına salasynda tsıfrlandyrý jaqsy damyp otyr. Qazir turǵyndardy tirkeýge arnalǵan qosymsha jasaqtalǵan, sondaı-aq adamdar aldyn ala jazylyp, analızderin alyp, dárigerge habarlasa alady. Ekinshisi – ınfraqurylym. Máselen, keıingi 30-40 jyl ishinde negizinen megapolısterde kezek paıda boldy, ıaǵnı iri qalalyq emhanalar suranysqa sáıkes salynbady. Óziniń múmkindigine qaraı Astanadaǵy bir emhana 60 myń adamǵa qyzmet kórsetýi kerek. Al shyn máninde 80-90 myńdy qamtyp otyr», - dedi A.Ǵınııat Parlament Májilisinde tilshiler suraǵyna jaýap bere otyryp.

Onyń aıtýynsha, emhanalardyń azdyǵy uzyn-sonar kezekke alyp keledi.

«Bul óz kezeginde dárigerge jáne halyqtyń sanyna eseptelmegen ınfraqurylymǵa qosymsha júkteme. Sondyqtan Mindetti áleýmettik medıtsınalyq saqtandyrý aıasynda jeke klınıkalarǵa memlekettik tapsyrys berý týraly sheshim qabyldandy. Kelisimshart mindettemelerin naqty oryndaıtyn jeke klınıkalar bar, sondaı-aq qyzmetteriniń 80 paıyzyn aýtsorsıngke beretin emhanalar da kezdesedi. Osynyń saldarynan keıbir turǵyndar dárigerge qaralý úshin qalanyń túkpir-túkpirine barýǵa májbúr. Buǵan jol bermeý turǵysynda talaptardy kúsheıtpekpiz. Medıtsınalyq kómektiń sapasyn talap etemiz», - dedi mınıstr.