Qazaqstanda jeke kásipkerlikti tirkeıtin jańa servıs iske qosyldy
NUR-SULTAN. QazAqparat – Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi (TsDIAÓM) jáne Kaspi.kz qazaqstandyqtarǵa memlekettik qyzmetterdi onlaın túrde tez jáne ońaı alýǵa kómektesetin jańa servıster birlesip ázirleýde.
Bul týraly QazAqparat Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmetine silteme jasap habarlaıdy.
Osyndaı alǵashqy joba Kaspi.kz mobıldi qosymshasynda jeke kásipkerlikti tirkeý servısi bolyp tabylady. Servıs qujattardy qashyqtan tekserýge, kásipkerdi sáıkestendirýge, tirkeýdi rastaýǵa arnalǵan birqatar zamanaýı tehnıkalyq sheshimderdi qamtıdy.
Joba aıasynda Qazaqstan Respýblıkasy Tsıfrlyq damý, ınnovatsııalar jáne aeroǵarysh ónerkásibi mınıstrligi, Kaspi.kz, Memlekettik kirister komıteti jáne «E-lıtsenzııalaý» memlekettik derekter qory aqparattyq júıelerin ıntegratsııalaý júrgizildi.
«Bıznes arqyly memlekettik qyzmet kórsetý ıdeıasy mınıstrlik komandasyna tıesili. Odan keıin «UAT» AQ men Kaspi.kz-tiń úılesimdi atqarylǵan jumysy. Memlekettik qyzmetterdi neǵurlym tanymal servısterde usynýy el úshin tarıhı sát dep esepteýge bolady. Biz bıznespen belsendi túrde birge qyzmet etemiz, óıtkeni halyqtyń qyzmet alýda tańdaýy bolýy tıis. Bul ózara is-qımyl moraldyq turǵydan eskirgen Egov-qa júktemeni aıtarlyqtaı azaıtady jáne memlekettik qyzmetterdi usyný jónindegi jańa múmkindikter jasaıdy. Endi qazaqstandyqtar memlekettik qyzmetterdi ózderine yńǵaıly joldarmen ala alady»,-deıdi Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.
Kaspi.kz basshysy jáne negizin qalaýshylardyń biri Mıhaıl Lomtadze jańa biregeı servıstiń iske qosylýyna qatysty pikir bildirdi.
«Biz únemi eldegi eń tanymal Kaspi.kz qosymshasyna ınnovatsııalyq servısterdi qosamyz. Búgin biz kásipkerler úshin jeke kásipkerlikti tikeleı bizdiń qosymshamyzda onlaın túrde tirkeý múmkindigin iske qosamyz. Bul Kaspi.kz pen memlekettiń sátti yntymaqtastyqtyń taǵy bir mysaly. Qazaqstan Respýblıkasy Tsıfrlyq damý, ınnovatsııalar jáne aeroǵarysh ónerkásibi mınıstrliginiń komandasy bizdiń komandamen birge servısti qysqa merzimde iske asyrdy. Osy biregeı qyzmetti ázirleýge jáne iske qosýǵa qatysqandardyń barlyǵyna rahmetim sheksiz»,-dedi ol.
Jeke kásipkerlikti tirkeý úshin endi osy qyzmetti Kaspi.kz qosymshadan tańdap, saýalnamany toltyryp, Kaspi ETsQ kómegimen qol qoıý jetkilikti.
