Qazaqstanda jeke detektıvterdiń qyzmeti zańdastyrylmaq
ASTANA. KAZINFORM – Elimizde jeke detektıvter týraly zań jobasy ázirlenip jatyr.
«Jeke detektıvterdiń qyzmetin zańdastyrý áriden kele jatqan másele. Aıtalyq, qylmys jasalsa, bir dókeı sol óńirdiń polıtsııa bastyǵyna bir qońyraý shalyp, isti japtyryp tastaýy múmkin. Al jeke detektıv jaldasańyz ol qyzmet mindetine saı atqarady. Onyń tapqan dálel, dáıekteri qylmystyq isti ashýǵa qosymsha derek bolady. Sondyqtan bul salany quqyqtyq turǵydan retteý áldeqashan pisip-jetilgen másele dep esepteımin. Jeke detektıvterge qoıylatyn basty talaptyń biri ishki ister salasynda 10 jyldan astam jumys istegen bolýy tıis», - dedi Májilis depýtaty Abzal Quspan «Qazaqstandaǵy jeke detektıvtik qyzmetti zańnamalyq retteýdiń problemalyq máseleleri men perspektıvalary» taqyrybynda ótken dóńgelek ústel barysynda.
Halyq qalaýlysynyń aıtýynsha, elimizde jeke detektıvterdiń ınstıtýtyn qurý kerek.
«Onyń qyzmeti respýblıkalyq jáne oblystyq deńgeıde bolǵany abzal. Ázirlenip jatqan jeke detektıvter týraly zańnamada olarǵa lıtsenzııa berý jaǵy qarastyrylyp jatyr. Ol úshin ýákiletti organ belgilenedi, eger jeke detektıv zań talaptaryn buzǵan jaǵdaıda, ýákiletti organ onyń lıtsenzııasyn toqtatýǵa nemese tartyp alýǵa quqyly. Qazir elimizde jeke detektıv qyzmeti bar, biraq ol kóleńkeli túrde. Eger biz bul qyzmetti zańdastyrsaq, bıýdjetke qarajat túser edi. Eń bastyǵy olardyń qyzmeti zańdastyrylady», - deıdi ol.
Sondaı-aq, depýtat elimizde jeke detektıvterge qatysty resmı statıstıkalyq málimetterdiń joqtyǵyn aıtty.
«Búgingi tańda olar jasyryn túrde jumys isteıdi. ıAǵnı kollektor nemese kúzet fırmasy arqyly taǵy sol sııaqty. Olardyń qyzmeti zańmen rettelmegennen keıin, zań salasynda paıdalana almaımyz. Sonymen qatar olar memleketke salyq tólep otyrǵan joq. Jeke detektıvter aty aıtyp turǵandaı, jeke túrde qyzmet kórsetedi, ol jeke tulǵaǵa nemese uıymǵa bolýy múmkin. Damyǵan elderde atalǵan qyzmet áldeqashan zańdastyrylǵan», - deıdi Abzal Quspan.
Aıta keteıik, búgin Astanada QR Prezıdenti isi basqarmasy janyndaǵy Parlamentarızm ınstıtýty «AMANAT» partııasynyń qoǵamdyq saıasat ınstıtýtymen birlesip uıymdastyrǵan «Qazaqstandaǵy jeke detektıvtik qyzmetti zańnamalyq retteýdiń problemalyq máseleleri men perspektıvalary» taqyrybynda dóńgelek ústel ótti.
«Jeke detektıvtik qyzmet týraly» Qazaqstan Respýblıkasy zańynyń jobasy depýtattar men Parlamentarızm ınstıtýty ǵalymdar jáne sarapshylardy tarta otyryp, QR Parlamenti Májilisimen ózara is-qımyl jospary sheńberinde ázirlenip jatyr.
