Qazaqstanda jeke deregi taralǵan azamattarǵa mindetti túrde habar beriledi
ASTANA. KAZINFORM — Qazaqstanda jeke derekterdiń taralýy anyqtalsa, bul týraly endi tek ýákiletti organǵa emes, derekteri jarııa bolǵan azamattyń ózine de mindetti túrde habar beriledi. Bul jóninde Ortalyq kommýnıkatsııalar qyzmetinde ótken brıfıngte QR Jasandy ıntellekt jáne tsıfrlyq damý vıtse-mınıstri Dosjan Musalıev aıtty.
— Endi jeke derekterdiń taralýy anyqtalǵan jaǵdaıda bul týraly tek memleketke ǵana emes, azamattyń ózine de habarlaý kózdelip otyr. Bul uıymdardyń jaýapkershiligin arttyryp, adamdarǵa óz derekterin qorǵaý úshin der kezinde shara qabyldaýǵa múmkindik beredi, — dedi vıtse-mınıstr.
Onyń aıtýynsha, derbes derekterdi qorǵaýǵa qatysty jańa normalar «Derbes derekter jáne olardy qorǵaý týraly» zańǵa engizilgen.
Sondaı-aq iri kólemde derbes derekterdi óńdeıtin operatorlardyń arnaıy tizilimi qurylmaq. Bul mundaı uıymdarǵa qoıylatyn uıymdastyrýshylyq jáne tehnıkalyq talaptardy kúsheıtip, olardyń qyzmetine baqylaýdy jetildirýge múmkindik beredi.
Dosjan Musalıevtiń aıtýynsha, engizilgen ózgerister azamattardyń jeke derekterin qorǵaý deńgeıin arttyryp, tsıfrlyq júıelerdiń qaýipsizdigin kúsheıtýge baǵyttalǵan.
Aıta keteıik, buǵan deıin mamandar azamattardy jeke derekterin qorǵaýǵa muqııat bolyp, zańsyz paıdalanylǵan jaǵdaıda dereý quzyrly organdarǵa júginýge shaqyrǵan edi.
