Qazaqstanda jeke balabaqsha ashý jeńildeıdi
ASTANA. QazAqparat - Qazaqstanda jeke balabaqshany ashýǵa lıtsenzııa alý jeńildetiledi. Bul týraly búgin Astanada halyqqa esep berý kezdesýinde QR Bilim jáne ǵylym mınıstri Erlan Saǵadıev málim etti.
«Árıne, sapaǵa zalal keltirmeı, lıtsenzııalardy jeńildetý kerek ekeni túsinikti. ıAǵnı, bizde bilim berý úderisine tikeleı baılanysy joq kóptegen máseleler bar. Qazirgi kezde osy baǵyttaǵy jumystardy qarastyrýdamyz jáne qandaı da bir ońtaıly sheshim jasaýǵa talpynýdamyz»,-dedi E. Saǵadıev.
Onyń málimetine qaraǵanda, búginde elimizde 120 myńǵa jýyq búldirshin balabaqsha kezeginde tur. 2020 jylǵa qaraı barlyq balalardy tolyqtaı balabaqshamen qamtý josparlanyp otyr. Osy rette tek memlekettiń qarjysymen bul maqsatty júzege asyrý múmkin emes.
E. Saǵadıevtiń sózinshe, bul turǵyda jeke balabaqshalardy ashý úshin bıznesmenderdi yntalandyrýǵa ekpin qoıylýda.
