Qazaqstanda jeke adamdardyń bankrottyǵy qalaı rásimdeledi
Zań jobasynyń negizgi maqsaty - Qazaqstan Respýblıkasy azamattarynyń tólem qabiletsizdigine baılanysty máselelerdi sheshý jáne tólem qabilettiligin qalpyna keltirýdiń qazirgi zamanǵy ınstıtýtyn qurý. Qujatta sottan tys bankrottyq, tólem qabilettiligin qalpyna keltirý jáne sot bankrottyǵy sııaqty rásimderdi reglamentteý eskerilgen.
Májilis depýtaty Danııa Espaevanyń aıtýynsha, sottan tys bankrottyq rásimi aıasynda 1600 AEK-ke deıin qaryzy bar adamdar qamtylady. Ol úshin birneshe shart eskerilýi kerek. Osy oraıda bankter, mıkroqarjy uıymdary, kollektorlyq agenttikter aldyndaǵy bereshek 1600 AEK somasynan aspaýy tıis.
Ekinshi rásim – sot arqyly bankrottyq. Bul rásim barysynda boryshkerdiń múlki satylady. Túsken qarajat belgilengen kezekpen kredıtorlar aldyndaǵy qaryzdardy óteýge jumsalady.
«Eger jalǵyz turǵyn úı kepil zat nysany bolmasa, kredıtorlar ony talap ete almaıdy. Boryshkerdiń teris pıǵyl belgileri bolmaǵan jaǵdaıda, qalǵan tólenbegen qarjy esepten shyǵarýǵa jatady», - dedi depýtat.
Úshinshi rásim – tólem qabilettiligin qalpyna keltirý tártibi. Bul turǵyda turaqty tabys bolǵan jaǵdaıda, qaryzdy óteý úshin sot tártibimen bólip tóleý josparyn alý múmkindigi qarastyrylǵan. Qalpyna keltirý jospary qarjy basqarýshylarmen birlesip ázirlenip, sotpen bekitiledi.
Jalpy, bankrottyqtyń saldaryna toqtalsaq, qujatta 5 jylǵa nesıe alýdy shekteý eskerilgen. Ekinshiden, azamattar 7 jyldan keıin ǵana bankrottyqqa qaıta júgine alady. Úshinshiden, sot bankrottyǵy jáne tólem qabilettiligin qalpyna keltirý rásimderi kezeńinde boryshkerdiń elden shyǵýyna tyıym salýdy belgileý qarastyrylǵan.
«Atap aıtqanda, bul rásimderden ótýdi azamat óz erkimen sheshedi. ıAǵnı, adamdar bul ótinishti ózi berýi kerek. Basqa adamdar, memlekettik organ nemese bank azamattyń atynan bankrottyqqa ótinish bere almaıdy», - dedi D. Espaeva.
