Qazaqstanda jedel járdem qyzmeti tegin bolyp qala bermek

ASTANA. QazAqparat - Qazaqstanda jedel medıtsınalyq kómek qyzmetin shaqyrý aqyly bolatyny týraly áleýmettik jeliler, messendjerler arqyly taratylǵan aqparat shyndyqqa janaspaıdy, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Búgingi tańda jedel medıtsınalyq kómekti shaqyrý qyzmeti tegin medıtsınalyq kómektiń kepildik berilgen kólemi tizimine kiredi.

Mindetti áleýmettik medıtsınalyq saqtandyrýdy engizý aıasynda 2017 jyldan bastap atalǵan qyzmet respýblıkalyq bıýdjetten qarjylandyrylatyn medıtsınalyq kómektiń bazalyq paketine enedi.

Bul paket Qazaqstannyń barlyq azamattary úshin qoljetimdi bolmaq. Oǵan jedel járdem qyzmeti men sanıtarlyq avıatsııa, áleýmettik máni bar jáne shuǵyl jaǵdaılarda kórsetiletin medıtsınalyq kómek, profılaktıkalyq egý jumystary jatady.

Osylaısha, jedel medıtsınalyq kómekti shaqyrý qyzmeti QR azamattarymen qatar, respýblıka aýmaǵyndaǵy shetel azamattary úshin de tegin bolyp qala bermek.

Eske sala ketsek, mınıstrlik qyzmetine qatysty barlyq shynaıy aqparat www.mzsr.gov.kz resmı saıtta jarııalanady. Mınıstrliktiń Feısbýk áleýmettik jelisinde resmı paraqshasy bar.