Qazaqstanda jedel járdem kólikteriniń óndirisi qarqyn aldy
QOSTANAI. QazAqparat – Qostanaıdaǵy «SaryarqaAvtoProm» zaýyty jedel medıtsınalyq járdem kólikteriniń óndirisin keńeıtti, dep habarlaıdy QazAqparat tilshisi.
Sońǵy jaǵdaılarǵa baılanysty medıtsına qyzmetkerleriniń júktemesi artty. Soǵan baılanysty Qazaqstannyń densaýlyq saqtaý mınıstrligi arnaıy tehnıka parkin ulǵaıtý qajettiligi týraly habarlaǵany málim. Nátıjesinde Qostanaıdaǵy «SaryarqaAvtoProm» zaýyty jedel medıtsınalyq járdem kólikteriniń óndirisin keńeıtti.
«Buǵan deıin avtoóndirýshi kompanııa JAC mınıvenderiniń arnaıy tehnıkasyn qurastyrýdy jolǵa qoıǵan bolatyn. Koronavırýs pandemııanyń jaǵdaılaryn eskere otyryp, avtomobılderdi qaıta jabdyqtaý jáne Chevrolet Damas úlgisin tolyqtyrý týraly sheshim qabyldandy. Kólikter Qazaqstan Respýblıkasy Densaýlyq saqtaý mınıstrliginiń tehnıkalyq spetsıfıkatsııasy boıynsha shyǵaryldy. Jedel járdem mashınalary medıtsına qyzmetkerlerine arnalǵan. Jedel, senimdi, qozǵalysqa yńǵaıly avtokólikter paıdasyn tıgizedi degen oıdamyn. «Samuryq-Qazyna» ulttyq ál-aýqat qory men «Kaspi.kz» banki jańa avtokólikterge suranys berip qoıǵanyn aıta keteıik», - dep atap ótti «SaryarqaAvtoProm» seriktestiginiń dırektory Syrym Semeıbaev.
Zaýyt basshylyǵy atap ótkendeı, jınaqy avtokólik barlyq synaqtardan sátti ótken. Medıtsınalyq kólikter patsıentti tasymaldaýda tıimdi. Avtomobılder naýqastardy tasymaldaýǵa arnalǵan barlyq qajetti medıtsınalyq, sanıtarlyq jáne bakterıtsıdtik jabdyqtarmen, sonyń ishinde ókpeni jasandy jeldetýdiń portatıvti apparatymen, EKG-apparatymen, pýlsoksımetrmen jáne defıbrıllıatormen jabdyqtalǵan.
