Qazaqstanda Jedel medıtsınalyq kómek qaýymdastyǵy quryldy

ASTANA. QazAqparat - Qazaqstanda Jedel medıtsınalyq kómek qaýymdastyǵy quryldy. Onyń quramyna Respýblıkalyq sanıtarlyq avıatsııa ortalyǵy, sonymen qatar, aımaqtyq medıtsınalyq uıymdar kiredi, dep jazady Pm.kz.

Onyń negizgi maqsaty - Qazaqstandaǵy zamanaýı jedel medıtsınalyq kómek pen sanıtarlyq avıatsııa qyzmetin jetildirýge yqpal etý.

Qaýymdastyqtyń negizgi jumysy - respýblıkadaǵy atalǵan qyzmetterdiń basym baǵyttaryn damytý men olardy biriktirý, jedel medıtsınalyq kómek kórsetý salasyndaǵy quqyqtyq normatıvtik bazany ońtaılandyrý men sapasyn arttyrý boıynsha usynymdar jasaý.

Keleshekte Qaýymdastyq óz qyzmetin respýblıkadan tys sheńberde keńeıtip, alys jáne jaqyn shetelderdegi áriptestermen belsendi tájirıbe almasýdy josparlap otyr.

Biriktirilgen qyzmetti damytý, QR DSÁDM-niń málimetinshe, respýblıkadaǵy medıtsınalyq qyzmettiń sapasyn arttyrýǵa, sonymen qatar, jedel medıtsınalyq kómek qyzmeti júıesiniń máselelerin sheshýge múmkindik beredi.