Qazaqstanda jazǵy mektepterdiń jumysy aıaqtaldy
QR Oqý-aǵartý mınıstrliginiń baspasóz qyzmetinen málim etkenindeı, jazǵy mektepterde 2 mıllıonǵa jýyq bala qosymsha bilim aldy. Olardyń jumysy 26 mamyr men 17 maýsym aralyǵynda uıymdastyrylǵan bolatyn.
Jazǵy mektep oqýshylar bilimindegi olqylyqtyń ornyn toltyrýǵa múmkindik berdi. Oǵan 9, 11-synyp oqýshylarynan basqa barlyq oqýshy erikti túrde qatysty.
«3,6 mln oqýshynyń 2 mıllıonǵa jýyǵy jazǵy mektepte bilim aldy. Balalar men olardyń ata-analarynyń qalaýy boıynsha 38 myńnan astam oqýshyǵa jeke pánder boıynsha sabaqtar uıymdastyryldy. Balalardy yntalandyrý maqsatynda sabaq standartty formada emes, baǵalaýsyz ótkenin de atap ótken jón. Oqý kestesine mýzeılerge saıahat, ekskýrsııalar, iskerlik oıyndar, sheberlik sabaqtar, fılmder men mýltfılmderdi talqylaý kirdi. Kitap klýbtary, dıskýssııalar, strategııalyq sessııalar, debattar jáne basqa da formatta sabaqtar uıymdastyryldy. Jazǵy mekteptiń qorytyndysy boıynsha ata-analardyń oń pikirlerin aldyq», – dep aıtty Mektepke deıingi jáne orta bilim berý komıtetiniń tóraǵasy Gúlmıra Kárimova.
Oqýshylar sabaqtarǵa dúısenbiden jumaǵa deıin qatysty. Oqý matematıka, qazaq tili, aǵylshyn tili, fızıka, hımııa jáne taǵy basqa negizgi pánder boıynsha ótti.
Aıta keteıik, jazǵy mektep aıaqtalǵan soń muǵalimder jyl saıynǵy eńbek demalysyna shyǵady. Buǵan deıin pedagogterdiń demalysy 42-den 56 kúnge deıin uzartylǵan bolatyn.
