Qazaqstanda jazǵy mektepterde 2 mln-ǵa jýyq bala oqýyn jalǵastyryp jatyr

NUR-SULTAN. QazAqparat – Elimizde 26 mamyrda jazǵy mekteptiń jumysy bastaldy. Ol 2022 jylǵy 17 maýsymǵa deıin jalǵasady. Búgingi tańda 2 mıllıonǵa jýyq bala osy múmkindikti paıdalanyp, bilimderin shyńdap jatyr, dep habarlaıdy QR BǴM baspasóz qyzmeti.

Olardyń barlyǵy ýaqytty tıimdi ótkizip, yńǵaıly keste men qyzyqty formatta oqıdy. Jazǵy mektepter emtıhan tapsyratyn 9-11 synyp oqýshylarynan basqa, barlyq oqýshylar úshin uıymdastyrylǵanyn aıta ketý kerek.

Oqýshylar sabaqqa dúısenbiden jumaǵa deıin qatysady. Oqý, matematıka, qazaq tili, aǵylshyn tili, fızıka, hımııa jáne t.b. sııaqty negizgi pánder boıynsha ótedi.

«Jazǵy mekteptegi sabaqtar synyptaǵy oqýshylar sanyna qaramastan ótedi. Bul balalar úshin jaqsy múmkindik. Sebebi ár oqýshy bilimindegi olqylyqtardyń ornyn toltyryp, jańa bilim alady. Oqý yńǵaıly keste boıynsha qyzyqty formatta ótedi. Mysaly, sabaqtar mýzeılerde, taza aýada ótkizilip, ártúrli ekskýrsııalar uıymdastyrylady. Jazda balalar ýaqytyn telefon oıyndaryn oınap ótkizetinin bilemiz. Árıne, eger múmkindik berilse, ata-analar balalarǵa ýaqytty kitap oqýǵa nemese bilim alýǵa jumsaǵany durys ekenin túsindergeni abzal. Balalardyń jazǵy mekteptegi oqýǵa qyzyǵýshylyǵyn, yntasyn arttyrý úshin muǵalimder baǵa qoıyp, úı tapsyrmasyn bermeıdi. Al mektep ákimshiligi men ustazdary jazda oqý barynsha qyzyqty ári tanymdy ótýi úshin barlyq jaǵdaıdy jasaýy kerek. Qazirdiń ózinde ata-analar jaqsy pikirlerin aıtyp jatyr», - deıdi QR BǴM Mektepke deıingi jáne orta bilim komıtetiniń tóraıymy Gúlmıra Kárimova.

Jazǵy mektep aıaqtalǵannan keıin muǵalimder jyl saıynǵy demalysqa shyǵady, ol 42 kúnnen 56 kúnge deıin uzartyldy.