Qazaqstanda jazasyn ótep júrgenderge arnalǵan elektrondy bilezikter jasalady - QR ІІM
Sebebi qylmystyq jazany barynsha izgilendirý sharalary atqarylyp keledi. Osynyń nátıjesinde shartty túrde bas bostandyǵynan aıyrý sheshimderi shyǵarylady. Al ondaı adamdardy probatsııa qyzmeti baqylaıdy, dep xabarlaıdy QazAqparat tilshisi.
2009 jyly Qazaqstannyń túrmelerinde 49 myń adam jazasyn ótese, búginde tutqyndardyń sany 29 myńǵa deıin azaıdy. Al bostandyqqa shyqqan jáne shartty jazaǵa kesilgender memlekettiń jiti baqylaýynda bolady. Atalǵan jumysty qylmystyq atqarý ınspektsııalary negizinde qurylǵan probatsııa qyzmeti atqarady.
«Sottyń sheshimimen bostandyqta jazasyn ótep júrgenderdiń tárbıesin dál osy probatsııa qyzmeti baqylaıdy. Jyl basynan beri osy qyzmet arqyly 43 myń adam ótti. Aldaǵy ýaqytta biz probatsııa qyzmeti boıynsha texnıkalyq qadaǵalaý quraldaryn, ıaǵnı elektrondy bilezikterdi engizýdi josparlap otyrmyz. Biz elektrondy bilezikter máselesin talaı ret talqyladyq. Qazirgi kezde ondaı quraldardy óz elimizde shyǵarý týraly sheshim bar. Bul bastamany memlekettik-jekeshelik seriktestik negizinde iske asyrý josparlanǵan», - dedi Turǵymbaev búgin Úkimet úıinde ótken baspasóz máslıxatynda.
Onyń aıtýynsha, elektrondy bilezikter júıesin engizý úshin biraz aqsha qajet bolady. Sebebi bilezikterden bólek kompıýtrlik texnıkany da alýǵa týra keledi. Sosyn árbir qala men aýdanda arnaıy kabınetti jasaqtaý qajet. Ol arqyly jazalanǵandardy baqylap otyrýǵa bolady.
