Qazaqstanda jazasyn óteýshilerdiń jartysyna jýyǵy jumyspen qamtylǵan

ASTANA. KAZINFORM – Іshki ister mınıstrliginiń resmı ókili Shyńǵys Alekeshev isti bolyp sottalǵan azamattardy oqytý jáne eńbekpen baǵytynda atqarylyp jatqan is-sharalar týraly aıtyp berdi.

«Sottalǵandardy qoǵamǵa qaıta beıimdeý ádisteriniń biri – jumysqa ornalastyrý. Kolonııalarda sottalǵandardyń jartysyna jýyǵy jumyspen qamtylǵan. Jabyq mekemelerdegi iske qosylmaǵan óndiristik alańdarǵa jeke kásipkerler tartylyp jatyr, sol nysandarda 4 myńǵa jýyq sottalǵan jumys isteıdi. Jalpy, jabyq kolonııalarda 11 myńnan astam adam eńbek etedi. Olar negizinen qurylys materıaldaryn, metall konstrýktsııalaryn, aǵashtan jáne plastıkten jasalǵan buıymdardy jasaýmen, sondaı-aq, nan ónimderin pisirýmen aınalysady», - dedi Shyńǵys Alekeshev vedomstvoda onlaın ótken brıfıngide.

Onyń aıtýynsha, jazasyn ótep jatqandardy jumyspen qamtý ózderi keltirgen múliktik zalaldy óteýge, alıment tóleýge nemese týystaryna qarjylyq turǵydan kómektesýine múmkindik beredi.

«Sottalǵandardy oqytý da erekshe nazarda. Búginde 44 mekemede suranysqa ıe 35 mamandyq boıynsha kásiptik daıarlaý júrgiziledi. Atap aıtqanda, aǵash ustalary, sýretshiler, sylaqshylar, tiginshiler, naýbaıshylar jáne basqa kásip ıeleri bar. Osy baǵyt boıynsha shamamen 3 myń adam bilim alyp jatyr», - deıdi ol.

Aıta keteıik, búginde elimizde 37 myń adam jazasyn ótep jatyr.