Qazaqstanda jazasyn ótep jatqan 12 myńǵa jýyq adam jumyspen qamtyldy
ASTANA. KAZINFORM – Bul týraly penıtentsıarlyq júıe týraly ózekti máseleler boıynsha joldanǵan depýtattyq saýaldarǵa jaýap bergen Oljas Bektenovtyń jaýabynda aıtylǵan.

- Bas bostandyǵynan aıyrý oryndaryndaǵy eńbek sottalǵandardy túzetý men áleýmettik ortaǵa beıimdeýdiń basty quraly bolyp qalyp otyr. Jumyspen qamtylǵan sottalǵandardyń tártip buzý jaǵdaılary óte sırek kezdesedi. Bul óz kezeginde bas bostandyǵynan aıyrý oryndaryndaǵy turaqtylyqty qamtamasyz etýge yqpal etedi. Sondaı-aq eńbekpen tabylǵan tabys sot shyǵyndary men alımentterdi jáne ózge de mindettemelerdi tóleýge múmkindik beredi.
Búgingi tańda qylmystyq atqarý júıesi mekemelerindegi eńbekke jaramdy 22 myń adamnyń 12 myńǵa jýyǵy jumyspen qamtyldy, -delingen QR Premer-mınıstriniń jaýabynda.
Qylmystyq atqarý júıesinde basty jumys berýshi «Eńbek» RMK-sy bolyp tabylady. Atalmysh mekeme:
jeńil ónerkásip;
qurylys-montajdaý jumystary;
kúzet qyzmetiniń ınjenerlik-tehnıkalyq quraldaryn montajdaý, jóndeý;
beınebaqylaý júıesi, kommýnaldyq qyzmetter; tamaqtandyrýdy uıymdastyrý;
aýyl sharýashylyǵy ónimderin óndirý sııaqty jumystardy júzege asyrady.
Pavlodardaǵy kolonııada halal sabyn jáne sport kıimderi óndirile bastaǵany týraly jazdyq.