Qazaqstanda jazasyn ótep shyqqandar ýaqytsha turý ornyn panalaı alady
ASTANA. KAZINFORM – Eńbek jáne halyqty áleýmettik qorǵaý mınıstrligi arnaýly áleýmettik uıymdardyń qyzmettik qaǵıdalaryna tolyqtyrýlar engizdi.
Vedomstvonyń 2025 jylǵy 6 naýryzdaǵy buıryǵyna sáıkes jańa qaǵıda turǵylyqty jeri joq, bas bostandyǵynan aıyrý oryndarynan bosatylǵan nemese probatsııa qyzmetiniń esebinde turǵan adamdarǵa, sondaı-aq adam saýdasy men turmystyq zorlyq-zombylyq qurbandaryna ýaqytsha turý uıymyn qurýdy kózdeıtin tarmaqpen tolyqtyryldy.
Ýaqytsha turý uıymdary respýblıkalyq, oblystyq mańyzy bar jáne halqynyń sany 100 myńnan astam qalalarda memlekettik sektorda qurylady.
- Halyq sany 50 myń jáne odan da kóp aýyldar men aýdandarda jergilikti atqarýshy organdardyń sheshimimen ýaqytsha turý uıymyn qurý múmkindigi qarastyrylsyn, - delingen buıryq mátininde.
Aıta keterligi, ýaqytsha turý uıymy jergilikti atqarýshy organdardyń sheshimimen arnaýly áleýmettik qyzmetke muqtaj jandardyń sany keminde 50 bolǵan jaǵdaıda qurylady.
- Arnaýly áleýmettik qyzmetke muqtaj jandardyń sany keminde 25 bolsa, statsıonarlyq, jartylaı statsıonarlyq jaǵdaıda aýdandyq mańyzy bar qalalarda, kentterde, aýdandarda, jáne aýyldyq okrýgterde ashylýy múmkin, - deıdi vedomstvodan.
Buıryq 2025 jylǵy 24 naýryzda kúshine enedi.
Buǵan deıin elimizde sanıtarlyq-epıdemıologııalyq tekserýge jatatyn ónimder men nysandar tizimi jańartylǵany týraly habarlaǵan edik.