Qazaqstanda jaıylymdyq jerlerdiń elektrondyq kartasy jasalady

ASTANA. QazAqparat - Qazaqstanda jyl sońyna jaıylymdyq jerlerdiń elektrondyq kartasy jasalatyn bolady. Sondaı-aq egistik alqaptaryn tsıfrlandyrý tolyǵymen aıaqtalmaq. Bul týraly búgin Úkimettiń selektorlyq rejimdegi otyrysynda agroónerkásip keshenin tsıfrlandyrý barysy týraly baıandaǵan QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat tilshisi.

«Naqty eginshilik elementiniń biri bolyp tabylatyn tanaptardyń elektrondyq kartalaryn qurý aıasynda 23,7 mıllıon gektar jer nemese egistiktiń jalpy aýdanynyń 98,8 paıyzy tsıfrlandyrylǵan. Jyldyń sońyna deıin egistik jerlerdi tolyq tsıfrlandyrýdy aıaqtaý josparlanýda. Soltústik Qazaqstan, Aqmola, Qaraǵandy jáne Qostanaı oblystaryndaǵy 9 pılottyq sharýashylyqta naqty eginshilikti qoldanýdy taldaý úshin Qazaq agrotehnıkalyq ýnıversıteti tehnıkanyń múmkinderin tekserdi, tyńaıtqyshtardy dıfferentsıaldy engizýdi iske asyrdy, elektrondy óris kartasyn qurdy, topyraqtyń agrohımııalyq taldaýyn ótkizdi, egistikterdiń aramshóp basý kartalaryn qurastyrdy», - dep atap ótti ol.

Onyń sózine qaraǵanda, Qaraǵandy men Aqmola oblystaryndaǵy 2 sharýashylyqta meteostansalar kómegimen amerıkalyq «Data Transmission Network» jasaǵan aýa raıyn dál boljaý pılottyq jobasy qorytyndysy boıynsha olardy paıdalaný týraly usynystar engizý josparlanyp otyr. Aýa raıynyń kórsetkishteri 10-nan astam parametrler boıynsha júrgiziledi.

«Fermerlerdi jańa tehnologııalardy qoldanýǵa úıretý «Qaskeleń» agroparki, A.Baraev atyndaǵy astyq sharýashylyǵy, «Zarechnyı» JShS jáne Qazaq ulttyq agrarlyq ýnıversıtetindegi naqty egistik polıgondarynyń negizinde júrgizilýde. Jyldyń aıaǵyna deıin naqty sharýa qojalyqtary anyqtalyp, olardy et jáne sút baǵytyndaǵy tsıfrlyq fermalar deńgeıine deıin damytý boıynsha jumystar júrgiziletin bolady. Aǵymdaǵy jyldyń aıaǵyna deıin jaıylymdardyń elektrondyq kartalaryn jasaý josparlanyp otyr», - dedi vıtse-mınıstr.