Qazaqstanda jaıylymdardy tıimsiz paıdalaný olardyń tozý qaýpin ulǵaıtyp otyr
ASTANA. QazAqparat - Qazaqstanda jaıylymdardy tıimsiz paıdalaný olardyń tozý qaýpin ulǵaıtyp otyr. Bul týraly búgin Parlament Májilisinde «Jaıylymdar týraly» zań jobasynyń tanystyrylymy barysynda depýtat Jeksenbaı Dúısebaev málim etti. Aıta keteıik, zań jobasy Memleket basshysy aıqyndaǵan «100 naqty qadam» Ult josparynyń 35, 97-shi qadamdaryn iske asyrý jáne «Qazaqstan-2050» Strategııasynda júktelgen mindetterdi oryndaý maqsatynda ázirlengen.
Depýtattyń sózine qaraǵanda, respýblıkamyzda aýyl sharýashylyǵyna paıdalanylatyn jerler 200 mln. gektar bolsa, sonyń 187 mıllıon gektaryn jaıylym jerleri quraıdy.
«Solaı bola tura, aýyl turǵyndary tarapynan mal baǵatyn jer joq degen máseleni estý - bul árıne, nonsens. Sonymen qatar, respýblıkamyzdaǵy mal basynyń sany bar-joǵy 26 mıllıon. Budan bólek, bizdegi mal jaıylymdarynyń barlyǵy derlik eldi mekenderdiń mańynan alystamaı qaldy, osylaısha jyl saıyn mal jaıylymy tıisti erejelerdi saqtamaı, ondaı ýchaskelerdi aýystyryp turýǵa qatysty merzimdiligi saqtalmaı júrip jatyr. Bunyń saldarynan qazirdiń ózinde respýblıka boıynsha 27 mıllıon gektarǵa jetken jerdiń tozý kórsetkishi odan saıyn artý táýekelderin týǵyzady», - dedi J. Dúısebaev.
Onyń aıtýynsha, eldi meken mańyndaǵy jaıylymdar «demalyssyz» paıdalanylsa, shalǵaıdaǵy jaıylymdar tıimsiz, ne bolmasa múldem paıdalanylmaı otyr.
«Osydan-aq jaıylymdardy tıimdi paıdalaný boıynsha teńgerimdi qadamnyń saqtalmaı otyrǵanyn ańǵaramyz. Sonymen qatar, jańaryp turatyn jaıylym resýrstarynyń jyl saıynǵy nárliligi 25-ten 30 mıllıon jem birligin quraıtynyn da esten shyǵarmaý kerek. Jem-shóp qorynyń mundaı resýrsy mal sharýashylyǵyn damytý úshin jem-shóp óndirisiniń negizi bolýy kerek», - dedi depýtat J. Dúısebaev.
Aıta keteıik, zań jobasy elimizdegi jaıylymdar ınfraqurylymyn jaqsartýǵa, jaıylym jerlerdiń tozýyn boldyrmaýǵa, olardyń qorshaǵan orta ekojúıesindegi ekologııalyq tutastyǵyn saqtaýǵa baǵyttalady. Budan bólek, qujatta ekologııalyq taza mal ónimderin óndirýdi arttyrý máseleleri qarastyrylyp otyr.
