Qazaqstanda jaıylym jónindegi 5 zańǵa ózgeris endi
ASTANA. KAZINFORM — Memleket basshysy «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» Zańǵa qol qoıdy.
Bul qujat jaıylymdardy basqarý jáne paıdalaný salasyndaǵy zańnamany jetildirýge baǵyttalǵan.
Túzetýler 5 zańnamalyq aktige, onyń ishinde Jer, Orman kodeksterine engizildi.
Túzetýlerdiń birinshi blogy jekelegen adamdardyń malyn jaıýǵa arnalǵan jaıylymdyq alqaptardyń tapshylyǵyn joıýǵa baǵyttalǵan.
Osy maqsatta Jer kodeksine jáne «Jaıylymdar týraly» Zańǵa jaıylymdardyń jańa túri, ıaǵnı «qoǵamdyq jaıylymdar» uǵymy engizildi.
Qoǵamdyq jaıylymdar tek jergilikti turǵyndardyń malyn jaıýǵa paıdalanylady. Olar jalǵa berilmeıdi.
Qoǵamdyq jaıylymǵa jatpaıtyn jaıylymdardyń jalǵa berilýi jáne shabyndyq úshin paıdalanylýy múmkin.
Qoǵamdyq jaıylymdardy, sondaı-aq jaıylymdardy aýyl sharýashylyǵy alqaptarynyń basqa túrlerine aýystyrýǵa tyıym salyndy.
Mal sharýashylyǵy jáne mal jaıý úshin ýaqytsha óteýsiz jer paıdalaný normasynan (5 jylǵa) konkýrssyz jer alý múmkindigi alynyp tastaldy.
Bul maqsattar úshin jer konkýrstyq tártippen ǵana beriledi.
Ormandardyń resýrstyq áleýetin tıimdi paıdalaný úshin orman/tabıǵatty qorǵaý mekemeleri jyl saıyn ákimdikterdi bos emes jáne bos alańdardyń naqty oryndaryn kórsete otyryp, shóp shabýǵa jáne mal jaıýǵa bolatyn orman qorynyń ýchaskeleri týraly habardar etedi.
Túzetýdiń ekinshi blogy jaıylymdardy basqarý jáne olardy paıdalaný jónindegi josparlardy ázirleý jáne bekitý jónindegi talaptardy jańartty.
Túzetýdiń úshinshi blogy jaıylymdardyń degradatsııasy men shóleıttenýine, sondaı-aq olardy sýlandyrýǵa qarsy kúres tetikterin kúsheıtti.
Atap aıtqanda, jaıylymdardyń jaı-kúıin qalpyna keltirý jáne jaqsartý úshin jaıylymdardy geobotanıkalyq zertteý, monıtorıngteý, túgendeý jáne ózge de sharalar kózdelgen.
Jer paıdalanýshylar men menshik ıelerine topyraq qunarynyń joıylýyna jol bermeý, jer túrine sáıkes aýyl sharýashylyǵy jerlerin maqsatty paıdalaný mindeti engizildi.
