Qazaqstanda jaýyn-shashyn mólsherin kóbeıtý tehnologııasy synaqtan ótip jatyr
ASTANA. KAZINFORM — Túrkistan oblysynda jaýyn-shashyn mólsherin jasandy túrde arttyrý jónindegi pılottyq joba bastaldy. Joba Birikken Arab Ámirlikteriniń Ulttyq meteorologııalyq ortalyǵy, Túrkistan oblysynyń ákimdigi, QR Ónerkásip jáne qurylys mınıstrligi, «Qazgıdromet» RMK jáne «Qazaeronavıgatsııa» RMK-nyń birlesýimen júzege asyrylyp jatyr.
Jobanyń daıyndyq kezeńinde 2020–2024 jyldar aralyǵyndaǵy 39 meteostantsııanyń derekteri negizinde ǵylymı-zertteý jumystary júrgizildi. Atmosferalyq úderister men jer bederiniń erekshelikterin keshendi taldaý nátıjesinde Túrkistan oblysy pılottyq joba úshin eń perspektıvaly aýmaq retinde aıqyndaldy.
— Jaýyn-shashyn mólsherin jasandy túrde arttyrý tehnologııasy tek tabıǵı jolmen qalyptasqan tik baǵytta damyǵan býdaq-jańbyrly (Cumulonimbus) bulttar bolǵan jaǵdaıda ǵana qoldanylady. Áser etý úderisi jergilikti ári qysqa merzimdi sıpatqa ıe, klımattyq úderisterge yqpal etpeıdi jáne aýa massalarynyń qozǵalysyn ózgertpeıdi, — delingen «Qazgıdromet» RMK habarlamasynda.
«Qazgıdromet» RMK jobaǵa ǵylymı-meteorologııalyq súıemeldeý kórsetedi: atmosferaǵa táýlik boıy monıtorıng júrgizedi, spýtnıktik sýretter men sınoptıkalyq derekterdi taldaıdy, bult júıelerin baqylaıdy, sondaı-aq túsken jaýyn-shashyn mólsherine baǵalaý júrgizedi.
Alynǵan derekter tehnologııanyń tıimdiligine ǵylymı turǵydan baǵa berýge jáne onyń óńirdiń sý teńgerimi men aýyl sharýashylyǵy aýmaqtaryn qoldaýdaǵy áleýetin zerdeleýge múmkindik beredi.
Jasandy jaýyn klımatqa áser ete me myna siltemeden oqyńyz.
