Qazaqstanda jatyr moıny qaterli isigimen aýyratyndar jyl saıyn kóbeıip keledi
NUR-SULTAN. QazAqparat – Qazaqstanda jatyr moıny qaterli isigimen aýyratyndar jyl saıyn kóbeıip keledi. Bul týraly QR Densaýlyq saqtaý mınıstrliginiń bas onkolog dárigeri, Qazaq ulttyq onkologııa jáne radıologııa ınstıtýtynyń dırektory Dılıara Qaıdarova Instagram paraqshasynda ótken tikeleı efırde aıtty, dep habarlaıdy QazAqparat tilshisi.
«Jatyr moıny qaterli isigi 100% emdeledi. Dúnıejúzi boıynsha alyp qarasaq, jatyr moıny qaterli isigi aýrýy azaıyp keledi. Ókinishke qaraı, sońǵy 12 jyl boıy skrınıng júrgizip kele jatqanyna qaramastan Qazaqstanda bul dertpen aýyratyndar sany azaımaı tur, kerisinshe kóbeıip keledi. Bir qýantatyny – aýrýdyń alǵashqy satyda anyqtalý jaǵdaıy kóbeıdi. Áıelderdiń 80%-y bizge aýrýdyń alǵashqy satysynda keledi. Mundaı jaǵdaıda organdy saqtap qala otyryp ota jasaımyz jáne ómiriniń uzarýyna múmkindik týady. Áıelge ota jasaǵan kezde jatyr moınyn saqtap qala alsaq – arada 5 jyl ótkende bala kóterýine ruqsat ete alamyz», - deıdi Bas onkolog dáriger Dılıara
Sondaı-aq, ol pandemııa jatyr moıny qaterli isigin anyqtaýǵa qalaı áser etkenin aıtty.
«Pandemııa kezinde emhanalardyń bári jabyq boldy. Kóptegen adam skrınıngten ótýge bara almady. Ótken jyldyń qyrkúıek aıynda koronavırýsqa qatysty jaǵdaı turaqtalǵan kezde biz aımaqtardy aralap, skrınıng ótýge shaqyrdyq. Qazirgi ýaqytta tekserilgender qatary 70% ǵana qamtyldy. Emhanada aldyn ala jazylyp, skrınıngten ótýlerińizdi suraımyn. Koronavırýs – ınfektsııa, biz odan qalaı qorǵaný kerek ekenin bilemiz, al qaterli isikke qatysty jaǵdaı basqasha. Mindetti túrde ýaqytyly tekserilip otyrýymyz kerek», - deıdi ol.
