Qazaqstanda «jasyl» qor qurylady
ASTANA. QazAqparat - Qazaqstanda balamaly qýat kózderiniń jobalaryn iske asyrýǵa arnalǵan «jasyl» qor qurylady. Ol qorǵa «Green Capital Management» kompanııasy jetekshilik etpek. Bul jaıly «Jasyl ósim» forýmynda «Halyqaralyq jasyl tehnologııalar jáne ınvestıtsııalyq jobalar ortalyǵynyń» basshysy Rápil Joshybaev málim etti, dep habarlaıdy QazAqparat tilshisi.
Rápil Joshybaevtyń aıtýynsha, «Halyqaralyq jasyl tehnologııalar jáne ınvestıtsııalyq jobalar ortalyǵy» qazaqstandyq ónertapqyshtardyń jańa tehnologııalary men ónimderine granttar jáne mıkronesıeler berý, olardy kommertsııalandyrý baǵytyna basa nazar aýdarady. Osy rette ortalyq «Astana» Halyqaralyq qarjy ortalyǵymen birlese atalmysh salany qarjylandyrý baǵdarlamasyn jasaqtaýdy kózdeýde.
«Qazirgi ýaqytta ortalyq ınvestıtsııaǵa basa kóńil bólip otyr. Bul rette biz qazaqstandyq jáne aımaqtyq jobalarǵa analıtıkalyq jáne sarapshylyq resýrstardy tartqymyz keledi. Álbette, ol resýrstar energııanyń balamaly kózderine, taza tehnologııalar men «Green Capital Management» atty arnaıy qurylymmen (kompanııa) baılanysty bolady», - deıdi ol «Astana Finance Days» sharasy aıasynda ótken forýmda.
Rápil Joshybaev sonymen qatar, aldaǵy ýaqytta Qazaqstanda balamaly qýat kózderin óndiristerge kóptep tartý úshin jańa qorlar ashylatynyn atap ótti.
«Aldaǵy ýaqytta atalmysh «jasyl» qor AHQO-nyń erekshe quqyqtyq tártibi aıasynda jumys júrgizedi dep josparlanyp otyr. Sonymen qatar, kompanııa tikeleı ınvestıtsııalardyń qorlaryn basqarýdy seriktesterimen nemese ózi jeke basqara alatyndaı múmkindikke ıe bolady. Qorlar óziniń salalyq talaptary men ártúrli elderdegi seriktesteri boıynsha bólinedi. Máselen, jobalar negizinde «Balamaly qýat kózderiniń qory», «Ortalyq Azııanyń turaqty energetıkasy qory» jáne «Jasyl tehnologııalar qory» sekildi qorlardy ashý josparlanǵan. Al joǵary tehnologııaly kompanııalar men ónimderdi qarjylandyrý úshin Venchýrlyq qor qurylady», - deıdi Rápil Joshybaev.
Jospar boıynsha, «Green Capital Management» kapıtalǵa ınstıtýtsıonaldyq ınvestorlardy, jeke qarjy ınstıtýttaryn nemese halyqaralyq uıymdardy tartatyn Tikeleı ınvestıtsııalar qorlarynyń bas seriktesi bolmaq. Sáıkesinshe, atalmysh qorlar jobalardan ІRO arqyly bırjaǵa shyǵarylady. Al «jasyl» jobalardy qarjylandyrý boıynsha «jasyl» oblıgatsııalar AHQO bazasynda qurylady.
