Qazaqstanda «jasyl» energııany satyp alý boıynsha alǵashqy aýktsıon 2018 jyly ótedi

ASTANA. QazAqparat - QR Energetıka mınıstri Qanat Bozymbaev balamaly qýat kózderinen alynatyn energııaǵa ıe bolý maqsatynda Qazaqstanda alǵashqy aýktsıonnyń qashan ótetinin atady, dep habarlaıdy «QazAqparat» HAA tilshisi.

«2018 jyly biz balamaly qýat kózderi (BQK) boıynsha pılotty aýktsıon ótkizýdi josparlap otyrmyz. Menińshe, ondaǵy ashyqtyq pen sharttardyń tıimdiligi bul aýktsıondy halyqaralyq dárejege jetkizer degen úmittemin. Ol bizge BQK-ǵa degen tarıfti tómendetip, bul saladaǵy halyqaralyq iri oıynshylardy tartýǵa sep bolar degen senim bar. Aıta keterligi, bizde bir aı buryn ǵana balamaly qýat kózderi boıynsha tirkelgen baǵa bar edi. Máselen, ondaǵy kórsetkish boıynsha onyń baǵasy 10-11 tsent bolatyn. Bul teńgege shaqqanda 34-36 teńge», - deıdi energetıka mınıstri.

Onyń aıtýynsha, Saýd Arabııasy ótkizgen sońǵy aýktsıonda Masdar kompanııasy baǵasy 1,8 tsenttik 800 megavat qýat kózin utyp alǵan.

Mınıstr sonymen birge, aýktsıondy ótkizýdiń arqasynda elimizdegi «jasyl» energııanyń tarıfi arzan bolatynyna senim bildirdi. Qanat Bozymbaev sonymen birge, Qazaqstandaǵy balamaly qýat kózderin damytý maqsatynda halyqaralyq qarjy ınstıtýttarymen kelisim jasalǵanyn, Eýropa banki bul baǵytta 200 mıllıon eýro, sondaı-aq Qazaqstandaǵy BQK jobalary úshin taǵy da 480 mln eýro bólgeli otyrǵanyn jetkizdi.