Qazaqstanda jasy 100-den asqan 487 qart bar
ASTANA. QazAqparat – Qazaqstanda 100 jastaǵy jáne odan da úlkenirek 487 turǵyn bar. Eń qarty Túrkistan oblysynda turady, ol 121 jasqa tolǵan, dep habarlaıdy QazAqparat Eńbek jáne halyqty áleýmettik qorǵaý mınıstrligine silteme jasap.
«Ádette, elimizdiń ońtústik óńirinde adamdar uzaq ómir súredi deýge bolady. Túrkistan oblysynda 100 jáne odan joǵary jastaǵy 75 adam bar ekenin aıta ketý kerek. Uzaq ómir súrýshiler sany boıynsha ekinshi orynda elimizdiń eń iri qalasy – Almaty. Onda 100 jastan asqan 62 adam turady. Uzaq ómir súretinder sany boıynsha úshinshi orynda Almaty oblysy tur, onda 100 jáne odan joǵary jastaǵy 55 adam turyp jatyr», - delingen vedomstvo habarlamasynda.
Sondaı-aq, eń qart qazaqstandyq Túrkistan oblysynda turady, onyń jasy 121-de. Ekinshi – Shymkent qalasynyń turǵyny, ol 120 jas-ta. Úshinshi qarııa Jambyl oblysynda turady, ol bıyl 119 jyl jasady.
Aıta keteıik, jyl saıyn búkil álemde, onyń ishinde Qazaqstanda da 1 qazanda Halyqaralyq qarttar kúni atalyp ótedi. Bul merekeni 1990 jyly 14 jeltoqsanda Birikken Ulttar Uıymynyń Bas Assambleıasy 45 sessııada jarııalady. Ony ótkizýdiń basty maqsaty – egde jastaǵy adamdardyń memleket pen qoǵam aldyndaǵy eńbegin qurmetteý jáne taný, sondaı-aq olardyń problemalary men qajettilikterine, ómir súrý sapasyn arttyrýǵa nazar aýdarý, olarǵa jalpyǵa birdeı qamqorlyq kórsetý.
Buǵan deıin habarlaǵanymyzdaı, Qarttar kúnine oraı elordada turatyn 91 672 zeınetker birjolǵy áleýmettik tólem alady.
Sondaı-aq, osy merekege oraı elordalyq mádenıet, bilim berý, sport mekemeleri aǵa urpaqqa qamqorlyq, qurmet kórsetýge baǵyttalǵan kóptegen is-shara ótkizedi.
