Qazaqstanda jastarǵa arnalǵan telearna ashyldy
ASTANA. QazAqparat - Astanada «J1-JASTAR1» jastarǵa arnalǵan jańa televızııalyq arnanyń tusaýy kesildi, dep habarlaıdy «QazAqparat» HAA tilshisi.
«J1-Jastar1» telearnasy - jastardyń talaptaryna saı zamanaýı televızııalyq trendterdi taratatyn, jastardyń jobalaryn, oı-pikirlerin qoldaýǵa, sonymen qatar olardyń arasyndaǵy ózekti máselelerdi sheshýge baǵyttalǵan jańa formattaǵy arna. Telearna 2018 jyldyń 28 naýryzynda ID TV platformasynda, You tube pen Instagram áleýmettik jelilerinde iske qosyldy. Bolashaqta «Otaý TV» kabel júıesi arqyly taratý josparlanyp otyr.
«Osyndaı telearna ashýǵa bir kún emes, birshama ýaqyt daıyndaldyq. Jastar arnasyn ashýǵa ne sebep boldy? Elimizde jastarmen birge jumys isteıtin arnaıy telearnanyń joqtyǵyn baıqadyq. Ózge baǵytta da arna ashý jóninde oılar bolǵanymen, jastardyń baǵytymen birge bolýdy sheship, aqyry jastar arnasyn ashýǵa bel baıladyq. Ózderińizge belgili, Qazaqstan naryǵynda kóptegen telearnalar bar. Al shyn máninde, jastar óziniń oıyn jetkizip, bir-birimen til tabysa alatyn, kókeıindegi suraqtarǵa jaýap taba alatyn telearnanyń joqtyǵy osy arnany ashýǵa muryndyq boldy. Telearnanyń eń negizgi baǵyty - bilim, saıasat jáne jastardyń turmys-tirshiligi, jastardy oılandyryp júrgen máselelerdi qaýzaý. Bul jerde jastarǵa arnalǵan baǵdarlamamen birge, fılmder de bolady», - dedi Ortalyq kommýnıkatsııalar qyzmetinde telearnanyń bas dırektory Іlııas Ysqaqov.
«J1-Jastar1» telearnasy, eń aldymen, 14-29 jas aralyǵyndaǵy jastarǵa baǵyttalǵanymen, oqýshylar, stýdentter, jas mamandar men ártúrli qyzmet atqaratyn jas urpaqtyń oıyna nemquraıly qaramaıtyn barlyq jandar úshin qyzyqty bolmaq.
Arnanyń formaty - jastar ómirindegi mańyzdy ári qyzyqty oqıǵalar. Telearnanyń kontenti ózindik óndiristeri as úıi, sán men sulýlyqtan bastap shytyrman, tylsym oqıǵalarǵa, sportqa, telehıkaıalar men álemdik kınomatografııanyń hıtterine, áleýmettik realıtı men otbasylyq qarym-qatynas, baqyt, bala tárbıeleý men densaýlyq týraly baǵdarlamalardan turady.
«Telearnaǵa jeke ınvestorlar aqsha salady. Arna reıtıngi joǵary ári qyzyqty bolýy kerek dep esepteımiz. Sondyqtan, osylaısha, demeýshiler men jarnamalar berýshilerdi tartqymyz keledi», - dedi Іlııas Ysqaqov.
Foto: whathouse.com
