Qazaqstanda jastarǵa arnalǵan kıbersport akademııasy qurylady
ASTANA. QazAqparat - Astanada «Esports Academy» jumys ataýyn alǵan alǵashqy kıbersport ortalyǵy ashylady, dep habarlaıdy QazAqparat tilshisi.
«Qazaqstanda jastarǵa arnalǵan kıbersport akademııasy qurylady. Alǵashqy ortalyq jaqyn aılarda Astanada ashylady. Ortalyq Esports Academy jumys ataýyn aldy jáne ol úshin baǵdarlama, uıymdastyrý jáne jaraqtandyrý týraly jospar ázirlendi. Sondaı-aq, tehnıkalyq talaptar men kadrlyq quram bekitildi», - delingen «Tsıfrlyq Qazaqstan» memlekettik baǵdarlamasynyń Feısbýk paraqshasynda.
Atalǵan derekke súıensek, akademııa bazasynda CS:GO tártibi boıynsha jattyǵý, oqý, sheberlik saǵattary jáne 12-20 jas aralyǵyndaǵy jasóspirimderge arnalǵan týrnır ótkiziledi. Bul bazalyq oqý-jattyǵýlar kezdeısoq tańdaý emes. Bul tártip álemde keńinen tanymal, kóptegen komanda men uıymdar bar jáne osy tártippen keń aýqymdy týrnırler ótedi.
«Akademııaǵa ata-ana balasymen kelip barlyq suraqtaryna jaýap ala alady. ıAǵnı, kıbersport degen ne, ózin qalaı ustaý kerek, balany oınaýǵa tyıym salý qajet pe jáne taǵy basqa. Búginde kıbersportty - múmkindikter sporty dep ataýǵa bolady. Kıbersporttaǵy jeńis pen nátıje kóbinese taldaý, strategııa, komandalyq jumys jáne sportshylardyń beıimine baılanysty», -dep kórsetilgen málimdemede.
Qazaqstanda aldyn ala baǵam boıynsha kıber-ındýstrııa kontentiniń 1,5 mln shamasynda belsendi paıdalanýshysy men qoldanýshylary bar. Kıbersportpen myńdaǵan jastar áýestenedi, biraq kásibı túrde aınalysýshylar sany birneshe ondaǵan ǵana.
Aıta keter bolsaq, álemniń damyǵan elderinde kıbersport - arnaıy sport túri retinde moıyndalyp, ol Olımpıada oıyndarynyń resmı emes tizimine engizildi.
Sondaı-aq, habarlamada elimizde atalǵan sportty damytý men tanymal etý jolynda «Qazaq Cybersport Federation» federatsııasy jumys isteıtini aıtylǵan.
