Qazaqstanda jastarǵa arnalǵan ınnovatsııalyq baıqaý jarııalandy
Baıqaýǵa ótinim 19 qazan men 30 qazan aralyǵynda «Úzdik jas ǵylym», «Áleýmettik mańyzdy ınnovatsııalar» jáne «Jastardyń ınnovatsııalyq jobasy» nomınatsııalary boıynsha qabyldanady. Onyń ishinde jasyl energetıka, nano jáne bıotehnologııa, ónerkásip, argoınnovatsııa, IT, medıtsına, robototehnıka salalary boıynsha jumystardy usynýǵa bolady. Baıqaýdyń jalpy júlde qory 5 mıllıon teńgeni quraıdy.
«Osymen úshinshi jyl uıymdastyrylyp otyrǵan atalǵan baıqaýdyń basty maqsaty - jastardyń qoǵam men onyń damýy úshin mańyzdy bolyp tabylatyn ıdeıalaryn iske asyrý. Baıqaýǵa qatysýdyń erejeleri men talaptary «Jas Otan» resmı saıtynda kórsetilgen. Atalǵan baıqaýdyń taǵy bir ereksheligi shetelde turatyn qazaqtar da qatysa alady», -dedi «Jas Otan» jastar qanatynyń atqarýshy hatshysy Dáýlet Káribek.
Odan bólek, «Jas Otan» jastar qanaty QR Kıbersport federatsııasymen birlesip «Open Esports Cup» ashyq respýblıkalyq «Dota-2» týrnırin ótkizip jatyr. Shet elderde tanymal atalǵan sport túri ústimizdegi jyldan bastap Qazaqstanda resmı sport dep tanyldy. Týrnırdiń irikteý kezeńine elimiz boıynsha 1 035 adamnan quralǵan 208 komanda qatysty. 13-14 qazan kúnderi kıbersport biliktiligi boıynsha ashyq oıyn ótse, 15-19 qazan aralyǵynda onlaın rejiminde týrnırdiń ekinshi kezeńi ótýde, al fınal 11 qarashaǵa josparlanýda. Jeńimpaz topqa 2 mıllıon teńge syıaqy tabystalady.
Buǵan deıin habarlaǵanymyzdaı búgin «Jas Otan» ózderiniń el jastaryna arnalǵan áleýmettik jáne ınnovatsııalyq jobalarymen tanystyrdy.
