Qazaqstanda jastardyń eńbek jasaqtary qurylady

ASTANA. QazAqparat – Qazaqstanda kóshelerdi abattandyrý, mádenı sharalardy ótkizý jáne aýmaqtardy kógaldandyrý jumystarymen aınalysatyn jastardyń eńbek jasaqtary qurylmaq. Bul týraly Jastar jáne otbasy isteri komıteti ashyq talqyǵa shyǵarǵan tıisti buıryq-jobasynda jazylǵan, dep habarlaıdy QazAqparat tilshisi.

«Memlekettik jastar saıasaty týraly» QR Zańynyń 6-baby 12-2 tarmaqshasyna sáıkes, qosa berilip otyrǵan jastar eńbek jasaqtaryn qurý, uıymdastyrý, qamtamasyz etý, sondaı-aq olardyń qyzmetine monıtorıng júrgizý qaǵıdalary bekitilsin», - delingen buıryqta.

Qujatta kórsetilgendeı, jastardyń eńbek jasaqtaryna qatysý úshin 14-35 jas aralyǵyndaǵy QR azamattarynan ótinimder qabyldanady. Qujattar jastar resýrstyq ortalyqtaryna tikeleı júginý nemese «EL JASTARY» ınternet-resýrsy arqyly tapsyrylady.

Jastardyń eńbek jasaqtaryna qatysý úshin kelesi qujattar usynylady:

- ótinish;

- saýalnama;

- jeke basyn kýálandyratyn qujattyń kóshirmesi;

- kámeletke tolmaǵan azamattar úshin ata-analarynyń biriniń ne zańdy ókilderiniń jazbasha kelisimi;

- sottylyǵynyń bolý ne bolmaýy týraly anyqtama;

- densaýlyq jaǵdaıy týraly medıtsınalyq anyqtama;

- psıhonevrologııalyq uıymnan anyqtama;

- narkologııalyq uıymnan anyqtama;

- týberkýlezge qarsy uıymnan anyqtama.

Keıin jastar resýrstyq ortalyqtary usynylǵan qujattardyń tolyqtyǵyn tekserip, azamattardy jasaqtardyń quramyna engizý úshin tizim jasaıdy. Bir topta keminde 10 adam bolýy qajet.

Jasaq quramyna qabyldanǵan azamattar myna qyzmettermen aınalysady:

1. Kóshelerdi, skverler men saıabaqtardy abattandyrý;

2. Aýmaqtardy kógaldandyrý;

3. Bos ýaqytty uıymdastyrý boıynsha jumys, mádenı-buqaralyq is-sharalardy ótkizý jáne oǵan qatysý;

4. Jastardyń qajettilikteri men múddeleri negizinde QR zańnamasyna qaıshy kelmeıtin ózge de jumystar.

Jastar eńbek jasaqtarynyń qyzmeti QR zańnamasyna sáıkes júzege asyrylady.

Eskeretini – jasaq quramyndaǵy azamattar zııandy nemese qaýipti eńbek jaǵdaılary bar jumystarǵa jiberilmeıdi.

Buıryq 23 aqpanǵa deıin kópshilik talqylaýda bolady.