Qazaqstanda jastardyń bıznes-bastamalaryn júzege asyrý úshin grant bólinedi – Eńbek mınıstrligi

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Tamara Dúısenova Nur-Sultan qalasynyń jastar uıymdarynyń belsendi ókilderimen jáne jas kásipkerlermen kezdesti, dep habarlaıdy QazAqparat mınıstrliktiń baspasóz qyzmetine silteme jasap.

Mınıstr Memleket basshysynyń jastardy jumyspen qamtýǵa qatysty bergen tapsyrmalaryn oryndaý boıynsha mınıstrlik júrgizip jatqan jumys baǵyttary jáne jas kásipkerlerdiń bıznes-bastamalaryn qoldaý jóninde aıtty.

Jastar uıymdarynyń belsendi ókilderimen kezdesýde Tamara Dúısenova memleket jastardy jumyspen qamtý boıynsha birneshe bastamany júzege asyryp jatqanyn aıtty.

Qazir Elektrondyq eńbek bırjasynda 105 myńnan astam bos jumys orny usynylǵan. Sondaı-aq bırjada Ulttyq jobalar boıynsha bos jumys oryndarynyń biryńǵaı platformasy iske qosylǵan.

Mınıstr jumyspen qamtýǵa baǵyttalǵan taǵy bir mańyzdy shara – jastardy iri óndiristik kásiporyndarǵa jumysqa ornalastyrý jobasy týraly aıtty. Oǵan alǵash bolyp ERG kompanııalar toby qosylyp, bos jumys oryndarynyń tizimin Elektrondyq eńbek bırjasyna ornalastyrdy. Aldaǵy ýaqytta bırjada bos jumys oryndaryn usynatyn kompanııa sany artady.

«Ótken aıda Elektrondyq eńbek bırjasynda Qazaqstandaǵy alǵashqy onlaın eńbek jármeńkesin ótkizdik. Shara 35 jasqa deıingi jastardy jumysqa ornalastyrýǵa baǵyttalǵan. Jármeńkege 23 iri kompanııa, bank jáne saýda jelisi qatysyp, 1330 bos jumys ornyn usyndy. 3,5 myń rezıýme kelip tústi. Qazir jumys berýshiler úmitkerlerdi iriktep jatyr. Jármeńke turaqty túrde uıymdastyrylady», - dedi Tamara Dúısenova.

Jas kásipkerlermen kezdesýde mınıstr eńbek naryǵyna 2000 jyldardyń basynda dúnıege kelgen býynnyń shyǵa bastaǵanyn aıtty. Aldaǵy ýaqytta jyl saıyn 300-400 myń jas maman eńbekke aralasady. Osylaısha jumys kúshiniń qurylymy ózgerip keledi. Qazir jastar ıkemdi jumys kestesin jáne jeke damý múmkindigine kóbirek mán beredi.

Tamara Dúısenova Memleket basshysy Úkimettiń keńeıtilgen otyrysynda jastardy jumyspen qamtýǵa qatysty bergen tapsyrmalary boıynsha mınıstrlik 8 baǵyt boıynsha jumys júrgizip jatqanyn aıtty.

«Jastardy jumyspen qamtý boıynsha júrgizilip jatqan jumystyń taǵy bir mańyzdy baǵyty – Kásipkerlikti damytý jónindegi ulttyq joba sheńberinde jas kásipkerlerdi qoldaý bolyp tabylady. Jastarǵa óz kásibin bastaý úshin jeńildikpen (2,5%) nesıe beriledi. Sondaı-aq jastardyń bıznes-bastamalaryn júzege asyrý úshin grant bólinedi», - dedi mınıstr.

Kezdesý barysynda jastar uıymdarynyń ókilderi ózderin qyzyqtyrǵan saýaldaryn qoıyp, eńbek naryǵyn damytýǵa qatysty usynystaryn bildirdi. Óz kezeginde Tamara Dúısenova kezdesýge qatysýshylarǵa jumysqa ornalasý múmkindigine qatysty ózekti aqparatty qurdastaryna jetkizýdi usyndy. Al jas kásipkerlerdi mınıstr tsıfrlandyrý, ıkemdi jumys kestesi jáne ózge de máseleler boıynsha birlesken jobalardy júzege asyrýǵa shaqyrdy.

Tamara Dúısenova, jastar uıymdarynyń kóshbasshylary jáne jas kásipkerler osyndaı kezdesýlerdi turaqty túrde ótkizýge kelisti.