Qazaqstanda jastardyń agrarlyq uıymy iske qosyldy
ASTANA. KAZINFORM – Qazaqstanda WFF Kazakhstan National Youth Chapter — jastardyń azyq-túlik qaýipsizdigi, turaqty aýyl sharýashylyǵy jáne klımattyq bastamalar salasyndaǵy kóshbasshylyǵyn damytýǵa baǵyttalǵan jańa platforma óz jumysyn bastady.
Bul joba tek bizdiń elde ǵana emes, búkil Ortalyq Azııa aımaǵynda ashylǵan alǵashqy World Food Forum jastar bólimshesi.
Bastama BUU-nyń Azyq-túlik jáne aýyl sharýashylyǵy uıymymen (FAO) birlesip, Qazaqstan Respýblıkasynyń Aýyl sharýashylyǵy mınıstrliginiń qoldaýymen júzege asyrylyp otyr.
Chapterdiń seriktesteri qatarynda QR AShM, FAO Qazaqstan, sondaı-aq eldiń jetekshi joǵary oqý oryndary — ál-Farabı atyndaǵy QazUÝ, Qazaq ulttyq agrarlyq ýnıversıteti (QazNAÝ), Nazarbaev Ýnıversıteti, QazǴASA jáne basqa da bilim berý mekemeleri bar.
Aldaǵy ýaqytta halyqaralyq donorlardy, jastar jáne stýdenttik uıymdardy tartý josparlanyp otyr.
Búgingi tańda Qazaqstan halqynyń shamamen 29%-yn 14 pen 34 jas aralyǵyndaǵy jastar quraıdy, bul — 5,7 mıllıonnan astam adam, olardyń 2 mıllıonnan astamy aýyldyq jerlerde turady.
World Food Forum ulttyq jastar chapteriniń qurylýy qazaqstandyq jastardy jahandyq syn-qaterlerdi sheshýge, sonyń ishinde azyq-túlik qaýipsizdigin qamtamasyz etýden bastap klımattyń ózgerýine beıimdelýge deıin — belsendi is-qımylǵa qatysýǵa tyń múmkindikter ashady.
— Aýyl sharýashylyǵynyń bolashaǵyn jastardyń belsendi qatysýynsyz elestetý múmkin emes. Biz World Food Forum alańy jastar kóshbasshylary úshin jańa ıdeıalar qalyptastyratyn, ınnovatsııalyq sheshimder ázirleıtin jáne agrarlyq sektor men eldiń turaqty damýyna naqty úles qosatyn ortalyqqa aınalatynyna senemiz, — dedi QR Aýyl sharýashylyǵy mınıstrligi ókilderi.
Chapterdiń negizgi maqsattary turaqty aýyl sharýashylyǵyn qoldaý jáne klımattyq turaqtylyqty arttyrý, jas fermerler men mamandardyń agroazyq-túlik júıelerine qatysýyn keńeıtý, stýdentter men jas kásibı mamandar úshin akademııalyq jáne mansaptyq múmkindikter jasaý, sondaı-aq jastardyń óz bastamasymen uıymdastyrylǵan bilim berý baǵdarlamalary men zertteýlerdi damytý.
Budan bólek, Chapter ınnovatsııalar, bilim berý jáne memlekettik qurylymdarmen syndarly dıalog arqyly jastar men negizgi múddeli taraptardy agroazyq-túlik júıelerin damytý protsesine qatystyrýdyń negizgi quralyna aınalady.
Taǵy bir mańyzdy baǵyt — halyqaralyq yntymaqtastyqty nyǵaıtý jáne Qazaqstannyń World Food Forum aıasyndaǵy jahandyq dıalogtarǵa qatysýy deýge bolady.
Bul bastama ıdeıalarmen almasýǵa arnalǵan alań ǵana emes, sonymen birge Qazaqstan men búkil álemniń turaqty bolashaǵyna úles qosýǵa daıyn jańa býyn agrokásibı mamandar úshin naqty ósý joly bolmaq.
Aıta ketelik Qazaqstan astyǵy skandınavııalyq naryqqa shyǵýy múmkin.