Qazaqstanda jastar saıasatynyń óńirlik basqarmalary qurylady
ASTANA. 17 shilde. QazAqparat - Eldiń ár óńirinde jastar saıasatynyń óńirlik basqarmalaryn qurý jónindegi jumystar júrgizilýde, dep habarlady pm.kz saıtyna QR BǴM Jastar isi jónindegi komıteti tóraǵasynyń mindetin atqarýshy Nurlan Óteshev.
«Bilim jáne ǵylym mınıstrliginde anaǵurlym iri bólim - Jastar isi jónindegi komıtet qurylýda, qazir jastar saıasaty jónindegi óńirlik basqarmalar qurylyp jatyr», - dedi N.Óteshev.
Onyń paıymynsha, jańa komıtettiń qurylýy memlekettik jastar saıasatyn júzege asyrýdyń jańa qadamy bolady. Atalǵan sharalar barlyq deńgeıdegi jas qazaqstandyqtardyń áleýetin ashýdy kózdeıdi.
«Memleket jastar máselesine josparly túrde jaqyndap keledi, olardyń kókeıkesti máselelerine barǵan saıyn tereń úńilip, olardy sheshýdiń ońtaıly joldaryn usynýda», - dep atap kórsetti ol.
Esterińizge sala keteıik, ústimizdegi jyldyń sáýir aıyndaǵy Qazaqstan halqy Assambleıasynyń HІH sessııasynda Memleket basshysy Bilim jáne ǵylym mınıstrligi qurylymynda Jastar saıasaty jónindegi komıtet, al óńirlerde - tıisti basqarmalar qurý týraly tapsyrma bergen bolatyn.
