Qazaqstanda jastar saıasaty máseleleri boıynsha qoǵamdyq tyńdaýlar ótýde

NUR-SULTAN. QazAqparat - 3-19 aqpan aralyǵynda elimizdiń jeti óńirinde jastar jáne otbasy saıasaty salasyndaǵy ózekti máseleler boıynsha qoǵamdyq tyńdaýlar ótkizildi, dep habarlaıdy QR Aqparat jáne qoǵamdyq damý mınıstrliginiń baspasóz qyzmeti.

Olar óńirlik jáne vedomstvoaralyq ózara is-qımyldy kúsheıtý jáne jastar jáne otbasy saıasaty salasyndaǵy maqsattarǵa qol jetkizý úshin biryńǵaı ustanym qalyptastyrý maqsatynda QR AQDM Strategııalyq sessııalary sheńberinde ótti.

Osylaısha, búgingi tańda QR AQDM Jastar jáne otbasy isteri komıteti «Jastar» ǵylymı-zertteý ortalyǵymen birlesip onlaın-formatta Aqmola, Aqtóbe, Atyraý, Shyǵys Qazaqstan, Batys Qazaqstan, Qaraǵandy jáne Qostanaı oblystarynyń jurtshylyq ókilderimen semınarlar, dıalogtyq kezdesýler ótkizdi.

Іs-sharalarǵa 500-den astam jastar resýrstyq ortalyqtarynyń qyzmetkerleri, óńirlik jastar uıymdary men jastar isi jónindegi komıtetterdiń ókilderi qatysty.

Kún tártibinde Jastardy qoldaýdyń 2025 jylǵa deıingi Keshendi josparynyń negizgi baǵyttary, sondaı-aq «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasy, «Jastardyń damý ındeksin» ázirleý jáne engizý, sonymen qatar Táýelsizdiktiń 30 jyldyǵy aıasynda ázirlenip jatqan «Táýelsizdik urpaqtary» ulttyq jobasy talqylandy.

Qazirgi ýaqytta jastar jáne otbasy saıasaty salasyndaǵy keń aýqymdy máselelerdi qamtıtyn 60-tan astam usynystar jınaldy.

Mysaly, Aqmola oblysynyń JRO ókilderi «jastarmen jumys jónindegi maman» mártebesin zańnamalyq bekitý máselesin kóterdi.

Atyraý oblysy jastar resýrstyq ortalyǵynyń qyzmetkeri Sıdalıev Qaıyrjan jastarmen jumys jasaý boıynsha kadrlardy qaıta daıarlaý jáne biliktiligin arttyrý máselesin kóterdi, Batys Qazaqstan oblysynda óńir belsendileri «Jasyl El» jobasyn ortalyqtandyryp iske asyrýdy usyndy. ShQO Jastar saıasaty jónindegi basqarmasynyń jastar máseleleri jónindegi bóliminiń basshysy Erkebulan Baltabekov elimizdiń barlyq óńirlerine jastar úshin jalǵa beriletin turǵyn úı baǵdarlamasyn keńeıtýdi usyndy, bul onyń pikirinshe, jastardyń turǵyn úı máselesin sheshýge múmkindik beredi.

Jalpy, AQDM Strategııalyq sessııalary aıasynda qoǵamdyq tyńdaýlarǵa qatysýshylar osyndaı júıeli onlaın semınarlar qajet ekenin, olardyń kómegimen keri baılanys pen ádistemelik kómek alýǵa bolatynyn aıtty.

Jastar jáne otbasy saıasaty máseleleri boıynsha qoǵamdyq tyńdaýlar elimizdiń basqa óńirlerinde de ótedi.

Aıta keteıik, barlyq syndarly usynystar mınıstrliktiń aldaǵy jumysy kezinde eskeriletin bolady.