Qazaqstanda jastar sany kemip barady
ASTANA. QazAqparat - Búgin elordada «Jastar» ǵylymı-zertteý ortalyǵy ázirlegen «Qazaqstan jastary - 2017» ulttyq baıandamasynyń jobasyn talqylaýǵa arnalǵan shara ótti, dep habarlaıdy QazAqparat.
Ulttyq baıandama jobasyn tanystyrǵan atalǵan ortalyqtyń ǵylymı-ádistemelik bóliminiń jetekshisi Dana Áshimhanovanyń aıtýynsha, 2017 jyldyń basyndaǵy derekterge sáıkes elimizdegi 14 pen 28 jas aralyǵyndaǵy jastardyń sany 3994 464 adamdy quraǵan. Ótken jylmen salystyrǵanda jastardyń sany 100 myń adamǵa kemip otyr. Otbasy qurǵan jastardyń arasynda ajyrasý deregi de azaıa túsýde. Munan bólek, esepti kezeńde elimizden 3278 jas shetelge ketken. Onyń ishinde 7262 jas TMD elderi ishinen Reseıdi tańdasa, Eýropa elderinen Germanııaǵa 592 adam qonys aýdarǵan.
Onyń dereginshe, «Máńgilik el jastary - ındýstrııaǵa!» jobasy aıasynda elimizdiń 26 joǵary oqý ornynda 12203 jas bilim alýda. Olardyń aldy 2018 jyly oqýlaryn bitiredi. 2017-2018 oqý jylynda tehıkalyq jáne kásiptik bilim berý baǵdarlamasy aıasynda 6 óńirdegi 22 kolledjge 420 orynǵa memlekettik tapsyrys ornalastyrylǵan. 2015-2017 jyldary «Serpin» baǵdarlamasyn 1154 jas bitirgen.
Jalpy ulttyq baıandama jastardyń demografııalyq sıpattamasy, Qazaqstannyń táýelsizdik alǵan jyldaryndaǵy memlekettik jastar saıasaty, jastardyń áleýmettik-ekonomıkalyq jaǵdaıy syndy 8 bólimnen turady. Ony daıyndaýǵa elimizdiń joǵary oqý oryndary men ǵylymı-zertteý ınstıtýttarynyń ǵalymdary tartylǵan. Ulttyq baıandama osy jyldyń jeltoqsan aıynda Qazaqstan Úkimetiniń qaraýyna engiziledi.
