Qazaqstanda jastar densaýlyǵyn nyǵaıtýǵa arnalǵan halyqaralyq baǵdarlama iske qosyldy
PETROPAVL. KAZINFORM – Baǵdarlama jastar arasynda juqpaly emes aýrýlardyń aldyn alýǵa jáne salamatty ómir saltyn qalyptastyrýǵa baǵyttalǵan.
Halyqaralyq Young Health Programme (YHP) baǵdarlamasy M. Qozybaev atyndaǵy Soltústik Qazaqstan ýnıversıtetinde iske qosyldy.
Joǵary oqý ornynyń málimetinshe, Qazaqstanda alǵash ret qolǵa alynǵan joba AstraZeneca halyqaralyq bıofarmatsevtıkalyq kompanııasy men Just Support jeke qorynyń qoldaýymen júzege asyrylady.
Joba aıasynda stýdentterdiń densaýlyq týraly saýatyn arttyrý, aýrýlardyń aldyn alý, fızıkalyq jáne psıhologııalyq saýlyqty nyǵaıtý kózdelgen. Sondaı-aq jastardyń óz ortasynda salamatty ómir saltyn nasıhattaý bastamalaryna qatysýyna múmkindik beriledi.
Іs-sharaǵa Qazaqstandaǵy Ulybrıtanııanyń elshisi Sallı Djeın Aksýorsı, Shvetsııa elshisi Stefan Erıksson, ýnıversıtet basshylyǵy, halyqaralyq uıymdar jáne oblys ákimdiginiń ókilderi qatysty.
Jobanyń negizgi baǵyty - júrek-qan tamyrlary, onkologııalyq aýrýlar, tynys alý júıesiniń sozylmaly dertteri men qant dıabetiniń aldyn alý. Baǵdarlama barysynda temeki men alkogol tutyný, az qımyldaý, durys tamaqtanbaý sııaqty qaýip faktorlaryna erekshe nazar aýdarylady.
Ýnıversıtet rektory Erbol Isakaevtyń aıtýynsha, oqý ornynda UniMed medıtsınalyq klınıkasy, psıhologııalyq qyzmet jáne stýdentterdiń psıhologııalyq klýby jumys isteıdi. Jańa baǵdarlama osy múmkindikterdi halyqaralyq tájirıbemen ushtastyryp, jastardyń densaýlyqqa jaýapkershilikpen qaraýyn qalyptastyrýǵa baǵyttalmaq.
- Bizdiń maqsatymyz - stýdentterge sapaly bilim berýmen qatar, olardyń fızıkalyq jáne psıhologııalyq saýlyǵyn saqtaýǵa jaǵdaı jasaý. Jastar densaýlyqqa qatysty durys sheshim qabyldap qana qoımaı, bilim men paıdaly daǵdylardy qatarlastaryna da jetkize bilýi kerek, - dedi rektor.
Aldaǵy ýaqytta baǵdarlama aıasynda bilim berý jáne profılaktıkalyq sharalar ótkizilip, mamandardyń biliktiligi arttyrylady. Sonymen qatar óńirde profılaktıkalyq jáne dıagnostıkalyq jumystardy keńeıtýge arnalǵan jyljymaly zerthanany iske qosý josparlanyp otyr.
Young Health Programme - jastar arasynda juqpaly emes aýrýlardyń aldyn alýǵa jáne densaýlyq mádenıetin qalyptastyrýǵa arnalǵan halyqaralyq baǵdarlama. Kompanııanyń málimetinshe, bastama 60-tan astam eldi qamtıdy.
Buǵan deıin Atyraýda jastar forýmynda 500 myń teńgelik granttar tabystalǵanyn jazǵan edik.
