Qazaqstanda jasóspirimder tátti sýsynǵa qumar bolyp barady - zertteý

NUR-SULTAN. QazAqparat - Qazaqstanda mektep oqýshylarynyń 63 paıyzy kúndelikti tańǵy asyn ishedi. Mundaı derekti Ulttyq qoǵamdyq densaýlyq saqtaý ortalyǵynyń bas mamany Shynar Ábdirahmanova aıtty, dep habarlaıdy QazAqparat tilshisi.

Onlaın rejımde «HBSC ǵalamdyq jáne ulttyq zertteý nátıjelerimen tanystyrý» taqyrybynda ótken dóńgelek ústel barysynda ol 2017-2018 jyldary Qazaqstandaǵy mektep oqýshylarynyń óz densaýlyqtaryna qalaı qaraıtyndyǵyna qatysty zertteýler nátıjelerin jarııa etken bolatyn.

«Qazaqstan bul zertteýge alǵash ret qatysty. Oǵan 11, 13 jáne 15 jastaǵy 6,5 myńnan astam oqýshy qatysty. Elimizde mektep oqýshylarynyń 63 paıyzy kúndelikti tańǵy astaryn ishedi. Joǵary jastaǵy qyzdar mektepke baratyn kúnderi sırek tańǵy astaryn ishedi eken. Bul kórsetkish 15 jasqa qaraı munan da tómendeı túsedi. Dál osyndaı jaı kórshi elderde baıqalady. Qazaqstanda jasóspirimderdiń jartysy jemis-júıdek pen kókónisterdi kúndelikti tutynbaıdy. 13-ten 15 jasqa deıingi jasóspirimderdiń kúndelikti jemis-jıdek tutynýy azaıa túsedi», - dedi Shynar Ábdirahmanova.

Onyń dereginshe, quramynda qanty bar sýsyndardy árbir altynshy jasóspirim kúnine joq degende bir ret ishedi. Ásirese, ul balalardyń mundaı sýsyndardy jıi tutynatyndyǵy baıqalady.

«Qazaqstanda jasóspirimderdiń besten biri nemese 17 paıyzy kúndelikti quramynda qanty bar sýsyn ishse, árbir tórtinshi jasóspirim tátti jeıdi», dedi sarapshy.

HBSC (Health Behaviour in School-aged Children) zertteý nátıjeleri balalar men jasóspirimderdiń densaýlyǵyn jaqsartý úshin kelisilgen saıası sheshimder men praktıkalyq sharalardy talap etetin problemalyq salalardy anyqtaýǵa múmkindik beredi.