Qazaqstanda jasóspirimder arasyndaǵy qylmystyq ahýal jaqsarmaı otyr - Q. Qasymov
ASTANA. QazAqparat - Qazaqstanda jasóspirimder arasyndaǵy qylmystyq ahýal jaqsarmaı otyr. Bul týraly búgin Májiliste ótip jatqan Úkimet saǵatynda Іshki ister mınıstri Qalmuhanbet Qasymov málim etti.
Vedomstvo basshysynyń aıtýyna qaraǵanda, qazirgi tańda birqatar memlekettik organdarmen birlese jasóspirimder arasyndaǵy qylmysty aldyn alý jumysy júrgizilýde. ІІM arnaıy bólimderi elimizde arnaıy esepte turǵan 100 myńnan astam kámeletke tolmaǵandardy óz baqylaýǵa alǵan. 16 myńnan astam bala tárbıelenip jatqan jaǵdaıy nashar otbasylarynda maqsatty túrde profılaktıkalyq jumystar júrgizilgen.
«Alaıda, osy atqarylǵan sharalardyń barlyǵyna qaramastan jasóspirimder ortasyndaǵy qylmystyq ahýal jaqsarar emes. Byltyrǵy jáne aǵymdaǵy jyly jasóspirimder 3 800 qylmys jasaǵan, olardyń ishinde 23 kisi ólimi, 49 shabýyl jasaý, 527 tonaý, 1 930 urlyq qylmystary bar. Aıta keterligi, birqatar jyldar boıy qaıtalanyp kele jatqan kámeletke tolmaǵandar arasyndaǵy qylmystardyń jartysyna jýyǵy bular oqýshylar men stýdentterge qatysty bolsa, onyń ishinde ishimdik nemese esirtki paıdalaný saldarynan oryn alǵan qylmystar», -dedi Q.Qasymov.
Mınıstrdiń aıtýynsha, jasóspirimder arasyndaǵy qylmystyń aldyn alý maqsatynda polıtsııa mektep ınspektory ınstıtýtyn damytý ústinde. «Bul maqsatta qalalyq jáne iri eldi mekenderdegi árbir mektepte ınspektorlar ınstıtýtyn engizý mańyzdy. Qazirgi ýaqytta bul úshin áli de 1 850 mektep ınspektorlary qajet. Sonymen qatar, elimizdegi jasóspirimder arasyndaǵy qylmystyń aldyn alý úshin arnaıy jalpy bilim beretin mektepter tapshy. Bizde aýyr qylmystar jasaǵan, qylmystyq jaýapkershilikke tartylýǵa tolmaǵan jasóspirimderdi qaıta tárbıeleýge arnalǵan tek bir ǵana jabyq tıptegi arnaıy mektep bar. Sondyqtan da, bizde qazirgi kúni eki myńnan astam kámelettik jasqa tolmaǵan qylmyskerlerdi qoǵamnan oqshaý tárbıeleýge múmkindik joq», -dedi Q. Qasymov.
