Qazaqstanda jasóspirim uldarǵa qaraǵanda qyzdar tis tazalyǵyna basa mán beredi - zertteý
Onlaın rejımde «HBSC ǵalamdyq jáne ulttyq zertteý nátıjelerimen tanystyrý» taqyrybynda ótken dóńgelek ústel barysynda ol 2017-2018 jyldary Qazaqstandaǵy mektep oqýshylarynyń óz densaýlyqtaryna qalaı qaraıtyndyǵyna qatysty zertteýlerdiń nátıjesin jarııa etken bolatyn.
«Kóptegen elderde jasóspirimderdiń úshten ekisi ǵana kúndelikti tisin eki ret tazalaıdy. Qyzdar aýyz qýysy tazalyǵy erejesin jıi ustanady. Jasóspirimder arasynda tis tazalaý kórsetkishi eń tómen elderdiń qatarynda Qazaqstan da bar. Elimizde balalardyń 49 paıyzy ǵana kúnine 2 ret jáne odan kóp ret tisin tazalaıdy. Bizde uldarǵa qaraǵanda qyzdar tisin jıi tazalap turady», - dedi sarapshy.
Onyń atap ótýinshe, jahandyq usynymǵa sáıkes, balalar kúndelikti 60 mınýt qarqyndy dene tárbıesimen aınalysýy tıis. Álemniń kóptegen elderinde bul kórsetkish ne bári 19 paıyzdy quraıdy. Al Qazaqstanda kún saıyn belsendi qımyl jasaıtyn balalar úlesi 33-34 paıyzǵa jetip otyr. Bul eń joǵary kórsetkish sanalady.
«Degenmen, ásirese qyzdar arasynda 15 jasqa qaraı dene qımyly belsendiliginiń tómen tendentsııasy bar. Biz sonymen qatar balalardyń elektrondy qurylǵy ekrany aldynda qansha ýaqyt ótkizetindigin de zerdeledik. Balalardyń 47 paıyzy túrli qurylǵy ekranynyń aldynda 3 jáne odan da kóp saǵat otyrady», - dedi Shynar Ábdirahmanova.
Sonymen qatar onyń deregine sáıkes, elimizdegi balalardyń teń jartysyna jýyǵyna mektep unaıdy. Bul álemniń búkil elderi ishindegi eń joǵary kórsetish.
«10 mektep oqýshysynyń jeteýi ustazdardyń, al 10 oqýshynyń altaýy synyptastarynyń jan-jaqty qoldaý kórsetetindigin aıtady. Bul mektepterimizdiń balalar úshin pozıtıvti, qolaıly orta ekendigin kórsetedi», - dedi sarapshy.
HBSC (Health Behaviour in School-aged Children) zertteý nátıjeleri balalar men jasóspirimderdiń densaýlyǵyn jaqsartý úshin kelisilgen saıası sheshimder men praktıkalyq sharalardy talap etetin problemalyq salalardy anyqtaýǵa múmkindik beredi.
