Qazaqstanda «jasyl» generatsııa úlesi 7%-ǵa jetti

ASTANA. KAZINFORM — Qazaqstan jańartylatyn energııa kózderi (JEK) salasy turaqty damyp keledi. Búginde elimizde jalpy belgilengen qýaty 3,5 gıgavattty quraıtyn 162 JEK nysany jumys isteıdi. Onyń ishinde: 67 jel elektr stantsııasy, 49 kún elektr stantsııasy, 43 sý elektr stantsııasy jáne 3 bıogaz elektr stantsııasy bar. Bul týraly Energetıka mınıstrligi málim etti.

2025 jyldyń qorytyndysy boıynsha «taza» generatsııanyń úlesi 7%-ǵa jetip, ornyqty energetıkalyq teńgerimge qaraı oń dınamıkany kórsetti. Aıta keteıik, 2024 jyly JEK úlesi eldegi elektr energııasynyń jalpy óndirisiniń 6,43%-yn quraǵan bolatyn.

— 2025 jyly jalpy qýaty 503 MVt bolatyn 9 jańa JEK nysany paıdalanýǵa berildi. Onyń ishinde: 5 jel elektr stantsııasy — 387 MVt, 3 kún elektr stantsııasy — 90 MVt, 1 sý elektr stantsııasy — 26 MVt, — delingen habarlamada.

Jańa nysandar Qaraǵandy, Ulytaý, Aqtóbe, Jetisý, Qyzylorda jáne Mańǵystaý oblystarynda ornalasqan.

JEK naryǵyn damytýdyń mańyzdy bóligi — 2024–2027 jyldarǵa arnalǵan jalpy qýaty 6,7 GVt bolatyn jospar sheńberinde ótkiziletin aýktsıondar. 2025 jylǵy jeltoqsan aıyndaǵy jaǵdaı boıynsha shamamen 4 GVt qýat bólingen, bul ınvestorlardyń joǵary qyzyǵýshylyǵyn jáne «jasyl» generatsııa naryǵynyń belsendi ekenin kórsetedi.

Total Eren, Masdar, China Power International Holding, China Energy sııaqty strategııalyq ınvestorlardyń qatysýymen halyqaralyq jobalar júzege asyrylatyn bolady.

Jalpy alǵanda, 2035 jylǵa deıin Qazaqstanda 8 GVt-tan astam JEK qýattaryn iske asyrý josparlanǵan. Bul elimizdiń turaqty «jasyl» energetıkaǵa kóshý, energetıkalyq qaýipsizdikti nyǵaıtý jáne ulttyq energojúıeniń turaqtylyǵyn arttyrý baǵytyndaǵy júıeli saıasatyn aıqyndaıdy.

Eske sala keteıik, Bakýdegi sammıtte Qazaqstan jasyl energetıkaǵa shamamen 3,7 mlrd dollar ınvestıtsııa tartqan edi.