Qazaqstanda jasyl energııa jobalary artyp keledi
ASTANA. KAZINFORM – Qazaqstandaǵy BUU Damý baǵdarlamasy jańartylatyn energııa kózderi tehnologııalaryna ınvestıtsııalaý táýekelderin tómendetý jónindegi jobanyń nátıjelerin usyndy.
QR Energetıka mınıstrligi mańyzdy jobany BUUDB Jahandyq ekologııalyq qordyń qarjylyq qoldaýymen júzege asyrǵanyn atap ótken jón.
Belgili bolǵandaı, 2060 jylǵa qaraı balamaly jáne jańartylatyn energııa kózderine aýysýyna baılanysty Qazaqstannyń kómirtegi beıtaraptyǵyna qol jetkizý jónindegi jobaǵa energetıka salasyndaǵy iri obektilermen qatar, shaǵyn jáne orta bıznes nysandary da tartylmaq.
Búginde Qazaqstanda Jahandyq ekologııalyq qordyń qarjylyq qoldaýymen jalpy qýaty 2.900 MVt bolatyn 148 iri nysany jumys isteıdi. Elektr energııasyn óndirýdiń jalpy kólemindegi jańartylatyn kózderdiń úlesi 6,5 paıyzǵa jetken.
«Ekonomıkany dekarbonızatsııalaý – bizdiń óskeleń urpaq aldyndaǵy jaýapkershiligimizdi kórsetetin basty mindetimiz. Qazba otyndarynan birtindep bas tartý jáne jańartylatyn energııaǵa kóshý endi órshil maqsat emes, álem elderi qabyldaǵan mindetteme. BUUDB usynǵan tásil úkimetterge zańnamany jaqsartý arqyly jańartylatyn energııaǵa jeke ınvestıtsııalardy tıimdi yntalandyrýǵa jáne taratýǵa kómektesedi. «Jasyl» bastamalardy qoldaı otyryp, biz adamdar men ǵalamshar úshin tómen kómirtekti bolashaqqa senimdi túrde aıaq basamyz», – dedi BUUDB-nyń Qazaqstandaǵy turaqty ókili Katarjına Vavernıa arnaıy uıymdastyrylǵan jıyn barysynda.
QR Energetıka vıtse-mınıstri Suńǵat Esimhanov mınıstrlik elimizdiń energııa teńgerimindegi jańartylatyn energııa kózderiniń úlesin ulǵaıtý boıynsha belsendi jumys istep jatqanyn atap ótti.
«Bul baǵyttaǵy jobalar Qazaqstanǵa parnıktik gazdar shyǵaryndylaryn qysqartyp qana qoımaı, energetıkalyq qaýipsizdikti nyǵaıtýǵa múmkindik beredi. Elektr energetıkasy salasyn damytý jónindegi is-sharalar josparyn tabysty iske asyrý barysynda 2035 jylǵa qaraı otyn túrleri boıynsha belgilengen qýattyń qurylymy mynadaı bolady: jańartylǵan energııa kózderi – 24,4 paıyz; gıdroelektrostantsııa – 10,8 paıyz; gaz – 25,8 paıyz; kómir – 34,3 paıyz», – dedi ol.
