Qazaqstanda jasy úlken stýdentterdiń sany eki esege artty

ASTANA. KAZINFORM – 2025-2026 oqý jylynyń basynda Qazaqstannyń joǵary oqý oryndarynda jasy 60-tan asqan 96 adam bilim alyp júr. Bul ótken oqý jylymen salystyrǵanda eki ese kóp, dep habarlaıdy Data Hub Telegram-arnasy.

Málimette atap ótilgendeı, bul sanatqa magıstratýra, doktorantýra, rezıdentýra baǵdarlamalarynda oqıtyndar kirmeıdi. ıAǵnı, tek bakalavrıat deńgeıinde bilim alyp jatqan stýdentter.

Ulttyq statıstıka bıýrosy derekterine sáıkes, 60 jastan asqan stýdentter sany 2009 jyldan beri eń joǵary deńgeıge jetken. Dál sol jyly bul jas sanaty alǵash ret resmı statıstıkada jeke kórsetkish retinde tirkele bastaǵan.

Qazirgi 96 stýdenttiń úshten ekisi, ıaǵnı 63 adam Shymkent qalasyndaǵy jekemenshik joǵary oqý oryndarynda bilim alyp júr. Olardyń basym bóligi – áıelder, atap aıtqanda 41 stýdent. Almaty qalasynda osy jas sanatyndaǵy 14 stýdent tirkelgen, olardyń 12-si áıel adam.

Sonymen qatar jasy 60-tan asqan stýdentterdiń úlesi jalpy stýdentter sanynyń nebári 0,01 paıyzyn ǵana quraıdy. Alaıda jasy 35-ten asqan stýdentter áldeqaıda kóp. El boıynsha bul sanatta 22,8 myń adam oqıdy, bul joǵary oqý oryndaryndaǵy barlyq stýdentterdiń 3,4 paıyzyna teń.

Jasy 35-ten asqan stýdentter sany boıynsha da Shymkent qalasy alda tur. Munda 3,8 myń adam nemese qaladaǵy barlyq stýdentterdiń 4,1 paıyzy osy jas sanatyna jatady. Odan keıin Almaty qalasy – 3,4 myń stýdent (1,6 paıyz), al Batys Qazaqstan oblysynda jasy 35-ten asqan stýdentter sany 3,3 myńǵa jýyqtap, óńirdegi barlyq stýdentterdiń 12,3 paıyzyn qurap otyr.

Sarapshylardyń pikirinshe, bul úrdis ómir boıy bilim alý tujyrymdamasynyń birtindep qalyptasyp kele jatqanyn jáne eresek jasta da jańa mamandyq meńgerýge degen suranystyń artqanyn kórsetedi.

Aıta keteıik, Qazaqstandyq stýdent álemdik deńgeıdegi jasandy ıntellekt baıqaýynda birinshi oryn aldy.