Qazaqstanda jasandy uryqtandyrý arqyly 14 myń bala dúnıege keldi
ASTANA. QazAqparat - Qazaqstanda jasandy uryqtandyrý arqyly 14 myń bala dúnıege keldi. Bul týraly búgin elordada ótip jatqan Qazaqstannyń reprodýkıvti medıtsına qaýymdastyǵynyń 9-shy halyqaralyq kongresi barysynda QR Densaýlyq saqtaý vıtse-mınıstri Lázzat Aqtaeva aıtty, dep habarlaıdy QazAqparat.
«Qazaqstanda qosalqy reprodýktıvti tehnologııalardyń kómegimen 14 myń bala dúnıege keldi. Tegin medıtsınalyq kómektiń kepildendirilgen kólemi aıasynda 4783 tsıkl jasalyp, oǵan memleket 3,8 mlrd teńge jumsady. Nátıjesinde 1532 bala dúnıe esigin ashty. Tolyqtaı alǵanda tegin medıtsınalyq kómektiń kepildendirilgen kólemi aıasyndaǵy nátıejilik 32 paıyzdy qurady», - dedi vıtse-mınıstr.
Onyń dereginshe, Qazaqstanda 14 myńnan astam áıel men 1 myńnan estam erkek bedeýligine baılanysty dıspanserlik esepke alynǵan. Jalpy elimizde otbasylardyń 15 paıyzy bedeýlikke ushyraǵan.
«Dúnıejúzilik densaýlyq saqtaý uıymynyń málimetinshe, nekedegi mundaı bedeýlik kórsetkishi problema bolyp sanalady. Óıtkeni, bul deńgeı demografııalyq kórsetkishke áserin tıgizedi», - dedi ol.
Aıta keterligi, ekstrakorporaldy uryqtandyrýdyń arqasynda Qazaqstanda birinshi bala 1996 jyly dúnıege kelgen bolatyn. Al 2010 jyldan bastap ekstrakorporaldy uryqtandyrý tegin medıtsınalyq kómektiń kepildendirilgen kólemine engizildi jáne onyń kólemi jyldan jylǵa artyp keledi. Máselen, 2010 jyly jylyna 100 tsıklge (jasandy uryqtandyrý) memleket qarjy bóletin bolsa, aǵymdaǵy jyly bul kórsetkish 900 tsıklge jetip otyr.
«Kelesi jylǵa arnalǵan memlekettik tapsyrys 2017 jylǵy shekte, ıaǵnı 900 tsıkl bolady. Qarjylandyrý kólemi de dál sondaı», - dedi Lázzat Aqtaeva.
