Qazaqstanda jasandy ıntellekt týraly zań jobasy ázirlenip jatyr
ASTANA. KAZINFORM – Elimizde tsıfrlyq kodeks jáne jasandy ınttelekt týraly zań jobasy ázirlený ústinde. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi Innovatsııalar damytý departamentiniń dırektory Darhan Myrzabaev málim etti.
«Mınıstrlik jasandy ıntellekt strategııalaryn ázirleý salasyndaǵy halyqaralyq tájirıbeni taldaý negizinde jasandy ıntellektti damytýdyń 2024-2029 jyldarǵa arnalǵan tujyrymdamasynyń jobasyn qalyptastyrdy. Tujyrymdama jobasy qazirgi ahýaldy taldaýdy, halyqaralyq tájirıbege sholýdy, jasandy ıntellektti damytýdy iske asyrýdy paıymdaýdy, damýdyń negizgi qaǵıdattary men tásilderin, nysanaly ındıkatorlardy jáne kútiletin nátıjelerdi qamtıdy. Sondaı-aq tujyrymdama jobasyn iske asyrý jónindegi is-qımyl jospary kózdelgen», - dedi Darhan Myrzabaev Ortalyq kommýnıkatsııalar qyzmeti alańynda ótken baspasóz máslıhatynda.
Jospar 5 negizgi baǵyttan turady – ınfraqurylym, derekter, adamı kapıtal, ǴZTKJ (Ǵylymı-zertteý jáne tájirıbelik-konstrýktorlyq jumystar) jáne jasandy ıntellekt ekonomıkasy.
«Sonymen qatar, mınıstrlik saraptamalyq qoǵamdastyqpen jáne QR Parlamenti Májilisiniń Parlamentarızm ınstıtýtymen birlesip tsıfrlandyrýdyń basshylyq qaǵıdattaryn bekitetin tutas salalyq qujatty ázirleý boıynsha jumys júrgizýde. Tsıfrlyq kodeksti ázirleý zań jobalaý jumystarynyń 2024 jylǵa arnalǵan josparyna engizildi. Bul qujat kelesi bloktardan turady: Jalpy erejeler (tujyrymdamalyq apparat, negizgi mindetter men prıntsıpter, quqyqtyq qatynastardyń sýbektileri men obektileri, quqyqtar men mindetter), negizgi bólim (tsıfrlyq úkimet, derekter, jasandy ıntellekt, tsıfrlyq ınfraqurylym jáne quraldar, kıberqaýipsizdik)», - deıdi ol.
Onyń aıtýynsha, tujyrymdama negizinde jasandy ıntellekt tehnologııalaryn qoldaný, atalǵan júıeniń qaýipsiz jumys isteýi jónindegi normalar, jasandy ıntellekt etıkasynyń qaǵıdattary men ony paıdalanýda aqparattyq qaýipsizdikti qamtamasyz etý kózdeledi.
«Májilis depýtattary mınıstrlikpen birlesip, jasandy ıntellektini qurý, damytý jáne paıdalaný kezinde memlekettik organdar, jeke jáne zańdy tulǵalar arasynda týyndaıtyn qoǵamdyq qatynastardy retteýge baǵyttalǵan jasandy ıntellekt boıynsha zań jobasy ázirlenip jatyr», - dedi D. Myrzabaev.
