Qazaqstanda jasandy ıntellektige negizdelgen biryńǵaı tsıfrlyq saýda ekojúıesi qurylady
ASTANA. KAZINFORM – Búgin Qazaqstan Respýblıkasynyń Saýda jáne ıntegratsııa mınıstri Arman Shaqqalıev Qazaqstan Respýblıkasy Prezıdentiniń shtattan tys keńesshisi, jasandy ıntellekt salasyndaǵy álemge tanymal sarapshy, kompıýterlik ǵylymdar doktory (Ph.D.), 01.AI kompanııasynyń negizin qalaýshy Dr. Kai-Fu Lee-men kezdesý ótkizdi.
QR Saýda jáne ıntegratsııa mınıtsrligi baspasóz qyzmetiniń habarlaýynsha, kezdesý barysynda taraptar saýda salasyn tsıfrlyq turǵydan jańǵyrtý, ishki jáne syrtqy saýdany damytý, elektrondyq kommertsııany keńeıtý, sondaı-aq memlekettik basqarýdyń tıimdiligin arttyrý maqsatynda jasandy ıntellekt tehnologııalaryn paıdalaný múmkindikterin talqylady.
Mınıstrdiń aıtýynsha, Qazaqstan Respýblıkasynyń 2030 jylǵa deıingi saýda saıasaty tujyrymdamasyna sáıkes mınıstrlik memleket, bıznes jáne tutynýshylardyń ózara is-qımylyn jasandy ıntellekt negizinde biriktiretin biryńǵaı tsıfrlyq saýda ekojúıesin qalyptastyrý ústinde. Bul bastama tsıfrlyq servısterdi bir ortaǵa toǵystyryp, memlekettik basqarýdyń tıimdiligin arttyrýǵa, saýda úderisteriniń ashyqtyǵyn qamtamasyz etýge, sheshim qabyldaý merzimin jedeldetýge, sondaı-aq ishki jáne syrtqy saýdany, elektrondyq kommertsııany jáne shıkizattyq emes eksportty damytýǵa tyń serpin beredi.
Kezdesý barysynda Dr. Kai-Fu Lee jasandy ıntellektti qoldaný arqyly uıymdardy tsıfrlyq transformatsııalaýdyń zamanaýı tásilderimen bólisti.
Ol jekelegen ІІ sheshimderin engizýmen shektelmeı, derekterge negizdelgen, ıntellektýaldy taldaýdy qamtıtyn jáne DRI (Directly Responsible Individual) qaǵıdatyna súıenetin birtutas basqarylatyn ekojúıe qurýdyń mańyzyn atap ótti. Bul qaǵıdat boıynsha árbir bastamaǵa onyń nátıjesine tikeleı jaýap beretin bir ǵana jaýapty basshy bekitiledi. Sonymen qatar taraptar saýda salasyndaǵy memlekettik basqarýdy jetildirý, sheshim qabyldaýdy qoldaý, tsıfrlyq servısterdi damytý jáne ishki ári syrtqy saýdanyń tıimdiligin arttyrý úshin jasandy ıntellektini paıdalaný máselelerin talqylady.
Kezdesýde Stanford AI Index Report 2026 baıandamasynda kórsetilgen jasandy ıntellektiniń jahandyq damý úrdisteri de sóz boldy. Qujatta tehnologııalardyń qarqyndy damýyna qaramastan, olardy uıymdardyń kúndelikti qyzmetine keńinen engizý negizgi mindetterdiń biri ekeni atap ótilgen. Osyǵan baılanysty memlekettik basqarýda jasandy ıntellektini qoldaný, derekterge negizdelgen servısterdi damytý jáne ashyq úlgidegi jasandy ıntellekt modelderin praktıkalyq mindetterdi sheshýge paıdalaný joldary qarastyryldy.
Kezdesý qorytyndysynda taraptar 01.AI kompanııasynyń zamanaýı jasandy ıntellekt sheshimderin saýda salasyna engizý, sarapshylyq tájirıbe almasý baǵytyndaǵy yntymaqtastyqty jalǵastyrýǵa nıetti ekenin rastady. Sondaı-aq mınıstrlik qyzmetkerlerin oqytý merzimderi men Qazaqstannyń tsıfrlyq ekonomıkasyn damytýǵa jáne básekege qabilettiligin arttyrýǵa baǵyttalǵan birlesken jobalardy iske asyrýdyń negizgi kezeńderi aıqyndaldy.
Osyǵan deıin Qazaqstannyń syrtqy saýda talaptarynyń ashyqtyǵyn arttyrýǵa umtylyp otyrǵany týraly jazdyq.
