Qazaqstanda jasandy ıntellekt jazǵan jańalyqtarǵa arnaıy belgi qoıylýy múmkin
ASTANA. KAZINFORM — Qazaqstanda jasandy ıntellekt kómegimen daıyndalǵan aqparattyq materıaldarǵa arnaıy belgi qoıý usynyldy. QR Mádenıet jáne aqparat birinshi vıtse-mınıstri Qanat Ysqaqov Astana Media Week forýmynda bul bastamany qoldap, redaktsııalarda jasandy ıntellektini paıdalanýdyń ortaq qaǵıdalaryn ázirleý qajettigin aıtty.
Onyń sózinshe, oqyrman men kórermen aqparatty daıyndaý barysynda jasandy ıntellekt qoldanylǵanyn bilýi kerek. Mundaı ashyqtyq aqparatqa degen senimdi saqtaýǵa múmkindik beredi.
— Algorıtm mátin jaza alady. Biraq ol jazǵan sózi úshin jaýap bere almaıdy. Jarııalanǵan aqparat úshin jýrnalıst pen redaktsııa jaýapty, — dedi Qanat Ysqaqov.
Birinshi vıtse-mınıstr jasandy ıntellektini qoldaný tártibin medıa ókilderi birlesip aıqyndaýy qajet dep esepteıdi. Onyń pikirinshe, kásibı etıka talaptary joǵarydan mindettelmeı, jýrnalısterdiń ortaq kelisimimen qalyptasýy tıis.
Sondaı-aq ol aqparattyń shynaıylyǵyn qamtamasyz etý úshin redaktsııalardyń kásibı talaptardy saqtaýy mańyzdy ekenin atap ótti. Tsıfrlyq platformalarmen básekelesý úshin jyldam jumys isteý qajet bolǵanymen, bul derekterdi tekserý men materıal sapasyna áser etpeýi kerek.
— Kez kelgen tehnologııanyń múmkindigi artqan saıyn ony paıdalanýdaǵy jaýapkershilik te kúsheıe túsedi, — dedi birinshi vıtse-mınıstr.
Qanat Ysqaqovtyń aıtýynsha, memleket sapaly jýrnalıstıkany qoldaýdy jalǵastyrady. Bul baǵytta zańnamalyq bastamalar, qarjylandyrý jáne granttyq baǵdarlamalar qarastyrylǵan. Ásirese aqparattyń shynaıylyǵyn tekserýge jáne memlekettik tildegi otandyq kontentti damytýǵa basymdyq beriledi.
Ol jalǵan aqparatty ajyrata bilý tek jýrnalıster men faktchekerlerdiń mindeti emes ekenin de eske saldy. Sondyqtan medıasaýattylyqty arttyrý qoǵam úshin mańyzdy bolyp qala bermek.
Buǵan deıin Astana Media Week forýmy 14–16 qazan aralyǵynda ótetinin habarlaǵan edik.
