Qazaqstanda jasandy ıntellekt salasynda qandaı jobalar iske asyrylǵan

Tsıfrlyq damý, ınnovatsııalar jáne aeroǵarysh ónerkásibi mınıstrligi elimizde jasandy ıntellekt salasynda iske asyrylyp jatqan jobalar jaıynda málimet usyndy, dep habarlaıdy Kazinform.

«Qazaqstanda densaýlyq saqtaý, bilim berý, quqyq qorǵaý, smart qalalar sııaqty túrli salalarda jasandy ıntellektiń algorıtmi men tehnologııalary qoldanylyp jatqan birqatar joba júzege asyrylyp jatyr. Máselen, densaýlyq saqtaý salasynda Cerebra (ınsýlt belgilerin dıagnostıkalaýǵa kómektesedi), Aident (ortodont dárigerlerine kómek), Smart ECG (elektrokardıogrammany qashyqtan zertteý), PneumoNet júıesi (ókpeniń on jeti patogendi aýrýyn anyqtaý) sııaqty jobalar Qazaqstanda ǵana emes, shet elderde de tanymal», –delingen mınıstrliktiń Kazinform agenttigine bergen jaýabynda.

«Aqyldy qala» salasynda TargetAI, Sergek Group jáne Beyne.ai sııaqty jobalar jasandy ıntellekt tehnologııalaryn, aýqymdy derekterdi óńdeýdi jáne qala syrtyndaǵy monıtorıngti paıdalana otyryp, beıne derekterdi taldaý múmkindigin beredi.

Budan bólek, qazir NEURON OIL baǵdarlama aıasynda munaı óndirýshi kompanııalar derekter negizinde óndirýdi basqarý boıynsha durys sheshim qabyldaı alady.