Qazaqstanda jasandy ıntellekt qansha jumys ornyna yqpal etedi
ASTANA. KAZINFORM — Jasandy ıntellekt jáne tsıfrlyq damý vıtse-mınıstri Dmıtrıı Mýn qazirden bastap Qazaqstan azamattarynda jasandy ıntellekt negizi boıynsha bilim alýyna múmkindik bar ekenin aıtty.
Búgin Senattyń jalpy otyrysynan keıin tilshiler jasandy ıntellekt aldaǵy jyldary qansha jumys ornyna yqpal etýi múmkin ekenin surady.
— Bul baǵyttaǵy baǵalaýdy Eńbek mınıstrligi jasaıdy. Osy oraıda bul vedomstvonyń vıtse-mınıstrimen pikir almasqan edik. Aldaǵy bes jylda 2,5 mln maman táýekelge tap bolýy múmkin, sebebi osy mamandyqtar avtomattandyrylýy yqtımal. Sonyń arasynda 1 mln-ǵa jýyq mamannyń jumysy jasandy ıntellektini qoldaný saldarynan avtomandyrylýy múmkin. Bul turǵyda bizde tıisti jospar bar, ıaǵnı 2029 jyldyń sońyna deıin Qazaqstanda 1 mln adamdy jasandy ıntellekt negizderine oqytamyz, — dedi Dmıtrıı Mýn.
Onyń aıýynsha, qazirdiń ózinde Astana Hub resýrsynda — ınternet saıtta alǵashqy vıdeo sabaqtardy qaraýǵa bolady.
— Sondyqtan Eńbek mınıstrligi qaı mamandyqtar joıylýy múmkin ekenin baǵalaıdy. Al Jasandy ıntellekt mınıstrligi men Ǵylym mınıstrligi jańa mamandyqtarǵa qaıta oqytý úshin tıisti kýrstardy daıarlaıdy. Keıbir kásipter joıylǵanymen, olardyń ornyna jańalary keldi, — dedi vıtse-mınıstr.
Budan buryn habarlanǵandaı, búgin Senattyń jalpy otyrysynda «Jasandy ıntellekt týraly» Zańy men ilespe qujat qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.
Aıta keteıik, 5 jyl ishinde Qazaqstanda 1 mln azamatty jasandy ıntellekt negizderine oqytý josparlanýda. Elimizdiń 20 joǵary oqý ornynda tıisti bilim berý baǵdarlamalary engizildi.