Qazaqstanda jasandy ıntellekt ınsýlt pen obyrdy erte anyqtaýǵa kómektesedi
ASTANA. KAZINFORM – Qazaqstanda densaýlyq saqtaý salasynda jasandy ıntellekt dárigerdi almastyratyn qural retinde emes, medıtsınalyq sheshim qabyldaýdy qoldaıtyn tıimdi kómekshi retinde qarastyrylyp otyr.
Sarapshylardyń málimetinshe, búginde qoldaný baǵyttary, jetilý deńgeıi jáne klınıkalyq mańyzdylyǵy boıynsha jiktelgen 50-den astam MedTech sheshimi taldanǵan. Jobalardyń basym bóligi dıagnostıkany jetildirýge, ońaltý úderisin jaqsartýǵa, medıtsınalyq kómektiń qoljetimdiligin arttyrýǵa jáne medıtsınalyq derekterdi óńdeýge baǵyttalǵan.
- Atap aıtqanda, ınsýltti, ókpe men sút bezi obyryn erte dıagnostıkalaý, sondaı-aq stomatologııalyq beınelerdi taldaý salasyndaǵy basym jasandy ıntellekt jobalarynyń tizbesi qalyptastyryldy. Bul sheshimder qazirdiń ózinde elimizdiń ártúrli óńirlerindegi medıtsınalyq uıymdarda engizilip, aýqymy keńeıtilip jatyr, - delingen Densaýlyq saqtaý mınıstrliginiń aqparatynda.
Sonymen qatar medıtsınalyq qyzmetterdiń sapasyn taldaý jáne basqarý, dárilik zattar men medıtsınalyq buıymdardy saraptaý, sondaı-aq sozylmaly júrek jetkiliksizdigin erte anyqtaý úshin jasandy ıntellekt quraldaryn kezeń-kezeńimen engizý josparlanyp otyr.
Aıta keteıik, «Oqjetpes» shıpajaıynda jasandy ıntellektige negizdelgen dıagnostıka bar.