Qazaqstanda jasandy ıntellekt azamattarǵa mamandyǵyna saı oqý kýrstaryn tańdap beredi
ASTANA. KAZINFORM – Qazaqstanda Skills Enbek platformasyndaǵy jasandy ıntellekt negizinde jumys isteıtin chat-bot endi azamattardyń kásibı tájirıbesi men daǵdylaryn eskerip, ózderine qolaıly onlaın kýrstardy usynady, dep habarlaıdy Eńbek jáne halyqty áleýmettik qorǵaý mınıstrligi.
Jańa fýnktsııany «Eńbek resýrstaryn damytý ortalyǵy» AQ ázirlegen.
Eger azamattyń Enbek.kz Elektrondyq eńbek bırjasynda túıindemesi bolsa, jasandy ıntellekt ondaǵy bilimi, eńbek ótili men kásibı daǵdylary týraly málimetterdi taldap, soǵan sáıkes keletin oqý kýrstaryn usynady.
Al túıindemesi joq paıdalanýshylar ózderiniń kásibı qyzyǵýshylyqtary men meńgergisi keletin daǵdylaryn kórsete alady. Chat-bot osy aqparat negizinde birneshe oqý nusqasyn usynady. Sońǵy tańdaýdy azamattyń ózi jasaıdy.
– Mundaı jeke usynystar biliktilikti arttyrýǵa, qosymsha daǵdylardy meńgerýge nemese basqa mamandyqqa aýysýǵa qajetti kýrsty tabýǵa múmkindik beredi. Platformada tegin de, aqyly da kýrstar bar, – dep habarlady mınıstrlik.
Qazir Skills Enbek platformasynda 1,3 mıllıonnan astam paıdalanýshy tirkelgen. Munda ártúrli baǵyt boıynsha 568 onlaın kýrs bar. Olardyń 60 paıyzdan astamy tegin.
Platforma iske qosylǵannan beri 1,29 mıllıonnan astam sertıfıkat berilgen.
2026 jyldyń alǵashqy toǵyz aıynda 114,8 myńnan astam qazaqstandyq onlaın kýrstardy sátti aıaqtady. Olardyń 43,3 myńy – jumyssyz azamattar.
Oqýdy aıaqtaǵan paıdalanýshylarǵa elektrondyq sertıfıkat beriledi. Eger azamattyń Enbek.kz platformasynda túıindemesi bolsa, sertıfıkat týraly málimetter oǵan avtomatty túrde engiziledi.
Osylaısha jumys berýshiler úmitkerdiń qandaı kýrstardan ótkenin jáne qandaı daǵdylardy meńgergenin kóre alady.
Jasandy ıntellekt kómegimen oqý kýrstaryn Skills Enbek platformasynan tańdaýǵa bolady.
Aıta keteıik, buǵan deıin Skills Enbek platformasynda 114 myńnan astam qazaqstandyq onlaın kýrstardy aıaqtaǵany habarlanǵan edi. Paıdalanýshylar arasynda aqparattyq tehnologııalar, qarjy, býhgalterlik esep jáne aýyl sharýashylyǵy baǵytyndaǵy kýrstar joǵary suranysqa ıe.
