Qazaqstanda jasalǵan traktor 800 myń teńge turady
ASTANA. QazAqparat - Elimizdegi eń arzan traktor Zaısan qalasynda shyǵarylady. Mundaı tehnıkalardy shyǵarý osy ýaqytqa deıin tek iri qalalardyń enshisine tıgen is edi, dep jazady egemen.kz.
Zaısan aýdany ákimdigi 2015 jyly Qytaı kásipkerlerimen osy elde shyǵarylatyn shaǵyn traktordy Zaısanda qurastyrý jóninde kelisimge kelgen. Sonyń nátıjesinde aýylsharýashylyq tehnıkalary men onyń qurylǵylaryn qurastyryp satatyn «Ertis TZ» atty ortalyq qurylypty.
Byltyrǵy jyldan bastap iske kirisken bul ortalyq ázirge 36 shaǵyn traktor shyǵaryp úlgergen. Іstiń qazirgi betalysy jaman emes. Osyǵan deıin 20-26 attyń kúshi bar 15 shaǵyn traktor satylǵan. Baǵalary da qymbat emes, 800 myń - 1 mıllıon teńge aınalasynda. Budan 14,6 mıllıon teńge qarjy túsken. Sol sekildi túrli qurylǵylar satýdan 4,8 mıllıon teńge qarjy kirgen.
Atalǵan shaǵyn kásiporyn endigi kezekte mototsıklder, kún batareıalaryn, kıiz úıler qurastyrý men jasaýdy da josparlap otyrǵan kórinedi.
«Ertis TZ» JShS-niń qurylyp, jumys isteýi úshin 80 mıllıon teńge ınvestıtsııa tartylǵan eken. Osyǵan oraı aýdan ortalyǵynda 12 jańa jumys orny ashylǵan. Jumys oryndarynyń sany aldaǵy ýaqytta arta beredi degen boljam bar.
Zaısanda jańa traktorlar shyǵarylyp jatqandyǵyn estigen kórshi aýdannyń kásipkerleri men jurtshylyǵy da bul qýanyshty jańalyqqa eleń etisip, qazirgi kúni óz usynystaryn aıtyp jatqan kórinedi. Ol usynystar jınaqtalyp, zerttelýde. Máselen, neǵurlym qýattyraq, 35-40 attyń kúshi bar traktorlar shyǵarylsa degen de usynystar bar.
Árıne, eger jaqsy suranys bolyp jatsa, ony da qanaǵattandyrýǵa bolady. Sóıtip, qurylǵanyna kóp óte qoımaǵan JShS-niń jumysy traktorlardyń jańa túrlerimen tolyǵyp, aýqymy keńeıe túsýi de ábden múmkin.
