Qazaqstanda jasalǵan taýarlardy jarnamalaýǵa memleket kómek kórsetýi kerek - depýtat
«Meniń depýtattyq saýalym toqyma ónerkásibine qatysty bolyp otyr. 2020 jyldyń qorytyndysy boıynsha, toqyma ónerkásibi jeńil ónerkásiptegi óndiris kóleminiń 55 paıyzdan astamyn nemese 71 mlrd teńgeni qurady. Al jeńil ónerkásiptegi óndiris kólemi 128 mlrd teńge boldy. Jalpy alǵanda, jeńil ónerkásip respýblıkadaǵy óńdeýshi ónerkásiptiń 1 paıyzyn jáne jalpy ishki ónimniń qurylymynda 0,1 paıyzdy qurady. Kórshi memleket - Ózbekstandy alatyn bolsaq, atalǵan kezeńde jeńil ónerkásiptiń úlesi 15,2 paıyz bolǵan. Ózbekstanda bul salada jumysshylardyń 28 paıyzǵa jýyǵy shoǵyrlanǵan. Elimizdegi toqyma buıymdary óndirisiniń negizgi úlesi - Shymkent qalasyna (25%) jáne Túrkistan oblysyna (31%) tıesili. Toqyma ónerkásibi halyqty, ásirese áıelderdi jumyspen qamtýǵa múmkindik beretin áleýmettik mańyzy bar sala ekenin eskersek, onda osy salanyń damýyna tıisinshe qoldaý kórsetýimiz qajet. Osyndaı usynystar jergilikti halyq pen kásipkerler tarapynan óńirlerge barǵan issaparymyz kezinde jıi kóterilgen máselelerdiń biri boldy», - dedi Ǵanı Tashqaraev Indýstrııa jáne ınfraqurylymdyq damý mınıstri Qaıyrbek Óskenbaevtyń atyna joldaǵan saýalynda.
Osy oraıda ol toqyma ónerkásibiniń jumysshylarymen bolǵan kezdesý barysynda birqatar ózekti máseleler kóterilgenin aıtty.
Sonyń nátıjesinde toqyma ónerkásibi kásiporyndaryn qazirgideı qıyn kezeńde qoldaý maqsatynda tıisti usynystar ázirlendi.
«Shetel valıýtasynyń turaqsyzdyǵyna baılanysty shıkizat qunynyń qymbattaýy saldarynan memlekettik tapsyrysty ýaqtyly oryndaı almaǵan mekemelerdi abyroısyz kásipkerler tizilimine engizýge moratorıı jarııalansyn. Ekinshiden, jumys pen tapsyrystardyń bolmaýy, salyqtyń tólenbeýi sııaqty turaqsyzdyq kezinde shottardy buǵattaýǵa moratorıı engizilsin. Sheteldik toqyma buıymdarynyń otandyq ónimnen aıtarlyqtaı arzan baǵamen ákelinýine jol bermes úshin shekarada baqylaýdy kúsheıtip, otandyq toqyma buıymdaryn óndirýshilerge qoldaý kórsetilsin», - dedi depýtat.
Onyń paıymynsha, toqyma buıymdaryn óndirý boıynsha keshendi jospar qurylýy kerek.
Ónim óndirýshilerge óndiris kólemin ulǵaıtýǵa, jumysshylardy qaıta daıarlaý men oqytýǵa qosymsha sýbsıdııa bólingeni mańyzdy.
«Іshki naryqta taýarlardy jarnamalaýǵa kómek kórsetilýi kerek. «Samuryq-Qazyna» qorynda toqyma buıymdaryna qatysty tenderde qoldanylatyn reseılik standarttardyń ornyna jalpy memlekettik standarttar ázirlenýi tıis», - dedi Ǵanı Tashqaraev.
